Shillong, Naitung, 24: Ka Enforcement Directorate (ED) ka la pynlong ïa ka jingkhynra ïa ka jingkhaïi dewïong beaiñ ha ka jylla Meghalaya bad ka jylla Assam. Da kaba pyntreikam ïa ki kyndon jong ka Prevention of Money Laundering Act (PMLA), ka Shillong Sub Zonal Office jong ka Enforcement Directorate ka la khynra ïa ki 15 tylli ki jaka ha ka 24 tarik, Ïaiong naduh ki bynta jong ka Jadigittim bad Nongalbibra kiba hap hapoh ka South Garo Hills shaduh ki karkhana pynlang dewiong ba don ha Jogighopa, Guwahati, bad Margherita ha Assam.
Ha ka jingkhynra ka ED ka la ïoh kurup T. 1.58 klur ka pisa, bun bah ki tiar digital, ki kot lyngkdop ba la thoh da ka kti, ar tylli ki kali rem dor bad ki lyngkhot lyngkhai na ki sakhi kiba pynpaw pyrthei ïa ka lynti jong ki kam be-aiñ ba la buhrieh hapoh ki kot ki sla thok bad ki kam leh thok.
“Wat hapdeng ka jingkhang ban tih dewiong ha ki shiphew snem ba la leit noh, ka jingtih dewiong thliew khnai ka dang jur bha khlem kino kino ki lad jingïada ïa ki nongtih dewiong beaiñ,” ong ka ED ha u kyrwoh ba la kdew ïa ki kam jaboh.
Ka jingtohkit jong ka ED ka long katkum ka ejahar ba la rejistar ha Shallang, West Khasi Hills, da kaba bsuh ïa kiba bun ki aiñ kynthup ïa ka Bharatiya Nyaya Sanhita, ka MMDR Act, ka Environment Protection Act, ka Explosive Substances Act, bad ka Benami Transactions Act.
Kumba 20 tylli ki thliew tih dewiong thliewkhnai la lap ba ki dang treikam ha ka thaiñ Era Aning bad Goreng. Ki nongtih dewiong, ki Sardar, ki , ki nongpynïaid kam ba la trei ha ki rukom u menbarim, ka jingma kaba ktah ïa ka koit ka khiah, ka jingsei ïa u dewiong sha sla khyndew kaba pynkheiñ ïa ki kyndon ïada mariang. Katto katne na ki nongtrei, kiba ym lah ban tip ki dei na ka jaidbynriew aiu, la aiti noh sha ki Pulit.
Manla ka sngi, 5 haduh 7 trok la kit ïa u dewiong na kawei pa kawei ka krem. Manla kawei ka trok ka kit 12 haduh 16 ton u dewiong. La kheiñ antad ba palat 1,200 ton u dewiong la kit ha ka shi sngi. Ka Syndicate ka kynthup ïa ki briew na Meghalaya bad na Assam ban pynthikna ba ki trok kiba kit ïa u dewiong ba la tih beaiñ ki mih na khappud ka Meghalaya bad ki rung sha Assam khlem kano kano ka jingshah talasi bad ka jingshah pyrkhing,” la pyntip ka ED.
Na ka bynta T. 1.27 lak haduh T. 1.5 lak shi trok, ki nongpynïaid par dewiong ki ïoh ka jingkular ban ai jingïada. Nangne ïa u dewiong la kit sha ki jaka lum thup ïa u dewiong sha Jogighopa bad nangne pat la kit sha ki karkhana pynmih dewbilat, ki karkhana shna mawit, ki karkhana shna nar, bad ki karkhana saiñ dewiong beaiñ.
“La pynmih ïa ki Bill bad ki Invoice thok ban ai ïa ka dur jong u dewïong ba la tih beaiñ na ka bynta ban pynïaid iew,” la ong ka Agency.
La lap ba kito kiba pynïaid ïa ki jaka lum thup ïa u dewiong ha Jogighopa, ki dei ki riewshemphang ha kaba ki shna ïa ki Invoice thok, bad la kynnoh ba ki pyni ba une u dewiong u dei uba mih na ki par kiba long aiñ ha Assam. Ka rukom siew pisa ka long beit lyngba ka jingthoh da ka kti khnang ban buh jingkhein thik pa thik ïa ka rukom lum pisa, ka jingsiew pisa bad ka jingïoh bam nong.
“Ïa ka pisa ba la pynmih ha kane ka kam la buh ha ki jaka jong ki nongpynïaid pisa, ïa kaba la talasi ïa ki jaka jong ki bad la kurup ïa ki Diary kiba don ïa ki thoh kiba ïadei bad ka pisa ba rung/mih,” ong ka ophis ED jong ka Shillong.
La ïathuh ba ki katto katne ki dkhot jong ka Syndicate ki ïatreilang bad ki nongpynïaid dewiong ha Margherita, Tinsukia ban nang ‘pynkhuid’ shuh shuh ïa ka tynrai jong u dewiong bad ban pynïaid ïa u kum uba la tih katkum ka aiñ.
Katba ki trai par pat ki ïoh jingmyntoi kaba thikna haduh T. 5,000 haduh T. 10,000 na ka bynta kawei ka trok, ka spah kaba la lum na ka jingtrei bym don ki nongïada, da kaba pynkheiñ ïa manla ki kyndon jingshngaiñ bad ki kyndon ïada mariang.
“Ka jingkheiñ kaba pdeng ïa u dewiong ba la tih beaiñ ha ka shisngi na ka thaiñ Era Aning bad Goreng jong ka South Garo Hills ka long kumba 1,200 ton eiei”, la pynkut ka ED.
Ka jingkylli kaba mih mynta ka long mano ba ai jingïada ïa ka Syndicate da ki snem? Haduh katno kane ka kam beaiñ ka la ïaid lait na ki bor jong ka aiñ? Kiei ki kam barieh kiba don shapoh u dewiong ka jylla Meghalaya? Ka ED ka la ong ba kan dang pynlong shuh shuh ïa ka jingtohkit kaba bniah halor kane ka kam be-aiñ.
