Shillong, Naiwieng 20 : Ka Bosco Media Network (dbmnTv) ka la pynkhreh mynta ban sdang noh shen ïa ka rynsan ïa kob rwai kaba tip kum ka ‘Sur Kynud – Season 4’, da kaba khot ba wer ïa ki heprit, ki samla bad wat kiba la san ba kin pyni ïa ka sap kyrpang kaba u Blei u la ai.
Ki nongjop ha kane ka lympung ïa kob kin ïoh ban khur ei ïa ka khusnam pisa kaba kot haduh 1lak tyngka.
Ym tang katta, kito ki nongrwai kiba don sap kin ïoh ruh ïa ka kabu ksiar wat ban leit shim bynta ha ki lympung kiba heh jong ka ri bad jong ka pyrthei ruh kumjuh, ong ki nongpynïaid ha ka jingkren bad ki lad pathai khubor ha Shillong Press Club.
Ka Sur Kynud ha kaba sdang nyngkong eh ha u snem 2021 ka la sdang da ‘The Voice : Ka Sur ki Khynnah Rit, ha kaba la plie lad tang ïa kiba dang rit. Ha kane ka lympung iwei I khunlung ba dang 7 snem i heprit SK Khariong i la ïoh ïa ka khusnam kaba kordor bha hadien ba ka Don Bosco Media Network ka la pynsiew lut baroh shi snem ka bai skul jong i.
Ïa ka nam lahduh jong ka lympung kaba nyngkong la ïoh ban rah da i heprit ba dang 11 snem i Chevinia iba la shah jied ruh ban mihkhmat ïa ka Meghalaya ha ka Vocal Star UK bad nangtei ruh i la khur ïa ka nam lahduh.
Ha ka samoi kaba ar pat ïa ka nam lahduh la ïoh da i Ellery D Kharkongor na ki 50 ngut ki nongshim bynta. Ine I heprit ruh i la ïoh ban mihkhmat ïa ka jylla ha ka ‘The Voice USA’.
Ha ka snem ba la dep pat, u samla Kitkupar Nongsiej u la ïoh ban khur ïa ka nam lahduh bad la shah jied ruh ban mihkhmat ïa ka India ha ka 28th Annual World Championships of Performing Arts (WCOPA) ha Long Beach California, hynrei ia kane ka lympung la pynsangeh noh shwa namar ka thma Russia-Ukraine.
Na ka bynta kito kiba kwah ban shim bynta na kylleng ki bynta jong ka Meghalaya, ki lah ban leh da kaba rejistar ha ka dor kaba 1000 tyngka. Hadien ba la sdang, kin sa ïoh ruh ia ka jinghikai bad ka jingbtin lynti ban pynjanai shuh shuh ia ka sap kaba ki don khlem da donkam siew ei ei.
Haba ïadei bad ki audition, ka por bad ka jaka ki nongshim bynta ki lah ban peit lyngba ka website – www.realkasurkynud.com bad na ki rynsan social media.
