Shillong, Lber, 25: Ki paidbah nongshong shnong jong ka thaiñ Nongstoiñ, ki la kyndit thret kumba ïuh tdong bseiñ hadien ba ki la ïoh pdiang ïa ka shithi na ka ophis jong ka Meghalaya Power Distribution Corporation Limited (MePDCL) Nongstoiñ kaba bthah ba kin ban siew ïa ka bai thang bording kaba kot da ki phew hajar bad don ruh kaba kot haduh shi lak tam bad kane ka la khie pynbitar lem ïa ki paidbah hadien ba kane ka tnat sam bording ka la byrngem ban phah kem lada ki paidbah kim siew ïa ka bai thang bording.
Ki paidbah kiba la ïoh pdiang ïa ki shithi na kane ka tnat sam bording, ha ka sngi Baar ki tur puk sha ophis treikam kaba don ha Nongstoiñ da ka jingthmu ban pan jingshai halor kane ka jingpoi shithi phah kem bad pynpaw ruh ba kam shym la don ka jingpynshai lane ban pynshisha la ka bai thang bording ka dei naduh u snem aïu.
Ryngkat ka jingsynran lang jongki dkhot ka Hynñiewtrep National Youth Movement (HNYM) West Khasi Hills District hapoh ka jingïalam u President Bah Tailan Lyngkhoi ki paidbah ki la ïakren ruh bad ki bor pynïaid jong ka ophis ha kaba ki bor pyniaid kim shym la lah satia ban ai ia ka jingpynshai kaba hun hynrei la shu ong ba ka dei beit ka jingleh na ki bor kiba kham halor.
