Shillong, Naitung, 11 : Ka Deputy Commissioner jong ka East Khasi Hills District ka Kong Rosetta Mary Kurbah ka la kyrpad ïa ki paidbah nongshong shnong jong ka Sor Shillong ba kin ïatreilang bad ki bor synshar District ha kaba ïadei bad ka jingpynjari ïa ka hukum ban khang ïa ki dukan bad ïa ki dukan die jingbam ha kylleng ka nongbah Shillong naduh ka por 10:00 baje mynmiet.
‘Ngi la ïoh bun ki jingujor ba ki don bun ki jingjia ha kylleng sawdong ka nongbah Shillong. Ngi la sakhi bun ki jingïashoh ïadat, ngi lap ba ki briew ki shongkai ha ki kali bad ka tem pynheh sur jingrwai bad kane ka pynthud bha ïa kiba bun balang,” ong ka Kong Kurbah ha ka jingïakren bad ki lad pathai khubor ha ka sngi baar.
“Hadien ka 10:00 baje mynmiet, ban ïaid ha surok bun kim sngew shngaiñ shuh. Namarkata ngi hap ban shim ïa kane ka rai ba hadien ka 10 baje mynmiet ki paidbah ki ladei ban leit phai noh sha la ing,” ka la ong.
Haba kylli, “u don u pud ba ngi hap ban pyrkhat tang ban ailad ïa kino ki briew kiba lah ban plie ïa ki dukan hadien ka por 10 baje mynmiet.”
“Ki jingjia kiba la jia ha sor Shillong kim long satia kiba shngaiñ bad hadien ka 10 baje shaneng ka leit ka wan kam shngaiñ satia. Ki Pulit jong ngi kin ym lah ban don lut sha manla ki kyndong kynshrot jong ka Sor Shillong ban tehlakam ïa ki jingjia,” la ong ka Kong Kurbah.
“Ïa ngi kiba hap ban peit ïa ka shongsuk shongsaiñ ngi hap ban bishar bniah ïa kum kine ki jingjia bad balei ki briew ki kwah ban leit shang kai mynmiet, ngi hap ban pynshong nongrim. Lada ngim khang ïa ki dukan tad haduh ka por 10 baje mynmiet kum kine ki jingjia kin ym jia khah khah,” la bynrap ka Kong Kurbah.
Halor ka jingkhñium jong ki nongdie dukan khamtam ha ka thaiñ Khyndai Lad ïa ka jingpynmih hukum, ka Kong Kurbah ka la ong, “kam dei ka jingpynshitom, hynrei ka dei namarba ngi sngewkhia ïa kiba la rangbah, ïa kiba la khie samla namarba la jyllei shaba palat ki kam runar kiba ladep jia. Ki kam runar ki la nang kiew bad ka jingjyllei jong u drok ruh ka jur bha bad ki jingjia kiba sniew ki ju jia ynda la miet.”
“Ngi kwah ban khanglad ïa kine ki jingjia bad dei na kane ka daw ba ngi la pynmih ïa kane ka hukum bad ynda la kham thanda ngin sa peit,” la ong shuh shuh ka Kong Kurbah.
Ha kaba ïadei bad ka jingkem ïa ki briew kiba donkti ha ka jingjia ha Laitumkhrah Police Station, u Superintendent of Police ka East Khasi Hills u Bah S. Nongtnger ula ong, “san ngut ngi la kem bad ki dang don mynta hapdeng ka jingshah tohkit bad ngim pat pynngat kyndon eiei namarba ngim pat pyndep ïa ka jingtohkit kaba bniah. U Investigating Officer (IO) u dang leh ïa la ka kamram.”
