Khliehriat, K’lyngkot, 14: Ki Pulit jong ka Umkiang Patrolling Post, East Jaiñtia Hills District katba ki dang pynlong ïa ka jingpynap ktem ha Ratacherra Anti Infiltration Check Post, East Jaiñtia Hills District ha ka 11 tarik, Kyllalyngkot, 2025 ki la ioh kurup ia ki dawai kuli Amphetamine na ki ar ngut ki kynthei Manipuri kiba shong ha kawei ka kali kamai Force Traveller kaba dang wan na ki thaiñ Assam.
Ki khubor na ki Pulit ka ïathuh, ki Pulit kiba la peit bad bishar bniah ruh ïa ki kot ki sla jong kiba shong kali ki la iohi ïa kawei ka kynthei kaba la tip kyrteng kum ka Esther Vunghoihching, kaba ki la i shankhmat bha bad katba ki dang khynra khynra ïa ki pla jong ka ki la lap kawei ka pla plastik rong ïong ba la buhrieh bha hadien ka seat bad na ka plastik ki la lap ba don lai tylli ki jingsong kiba rit ba la sop bha ba ki don arphewsan tylli ki pla kiba barit bad hapoh kine ki pla ba rit la thep haduh 200 tylli ki dawai kuli.
Hadien ba ki pulit ki la tohkit, ka Esther Vunghoihching ka la iathuh ba ka la wan lang bad ka nah nah jong ka, ka Nianenciin kaba shong ha kaba kane ruh ka la rah ïa ki dawai kuli. Kumta ki Pulit ki la rah noh ïa ki baroh ar ngut sha ophis jong ka Ratacherra Check Post.
Ki pulit ki la kem noh ïa ka Esther Vunghoihching, 37 snem ka rta kaba sah ha ka shnong Lapalang, Mawbynna, East Khasi Hills bad ia ka Nianenciin, kaba la 45 snem kq rta na ka shnong Bethel Veng, New Lamka, Churachanpur Sub Division, Manipur.
Hadien ba la test, ïa kitei ki dawai kuli ki la lap ba kitei ki dawai kuli ki dei ki dawai drok Amphetamine.
Na ka Esther Vunghoihching ki Pulit ki la ioh kurup 495.66 grams ki kuli dawai, kiba kynthup haduh kumba 5,000 tylli ki dawai kuli bad na ka met jong ka Nianenciin pat la ioh kurup 496.41 grams, kiba kynthup haduh 5000 tylli ki dawai kuli.
Ki pulit ki la register case ha Lumshnong Police Station bad pynngat hapoh ki kyndon aiñ jong ka NDPS Act bad kat haduh mynta ka jingtohkit ka dang ïaid shakhmat.
