Shillong, Lber 06: Ka sorkar jylla ka la pyllait ka pisa T. 10,54,92,638 sha ka ophis Deputy Commissioner ka West Garo Hills na ka bynta ban siew ïa ka bailutksan sha ki 59,224 ngut ki nongrep kiba la shah ktah na ka jingpynjulor jong ka mariang ha ka snem 2016 haduh ka snem 2019.
Na kine T. 3,24,57,668 la pyllait kum ka bai lutksan sha ki 16,427 ngut ki nongrep ha ka snem 2016, T. 3,85,93,200 sha ki 16,219 ngut ki nongrep ha ka snem 2017, T. 2,39,62,770 sha ki 8719 ngut ki nongrep ha ka snem 2018 bad T. 1,03,79,000 sha ki 17,859 ngut ki nongrep ha ka snem 2019, ïathuh u Myntri ba khmih ïa ka tnat Revenue & Disaster Management u Bah Kyrmen Shylla haba jubab ïa ka jingkylli ba la wanrah ha ka sngi Palei ha Dorbar Mang tyngka.
U la pyntip ba ki la don haduh 13,004 ngut ki nongrep kiba la ïoh ka bai lutksan bad katba 46,220 ngut ki dang ap ban ïoh ïa kane ka bai lutksan.
“Ka daw jong ka jingpynslem ban ai ïa kane ka bai lutksan ka dei na ka daw jong ka jingbym biang ki account ba la aiti da kiba ïoh jingmyntoi bad kiwei pat ki jingtip kiba bniah,” ïathuh u Myntri.
U la pyntip ruh ba ka tnat ka dang don ha ka kam ban pyntreikam noh da ka online portal ha kaba ïadei bad ki kam baroh kiba ka tnat ka donkam ha kaba ïadei bad ki kam shah ktah bad shah pynjulor ha ka mariang bad kumjuh ruh kaba ïadei bad ka jingmang pisa bad kumjuh ruh ka jingai ïa ka pisa sha ki briew kiba shah ktah.
U la pyntip ruh ba ka sorkar jylla ka la shim khia ban siew ïa ka pisa lyngba ka Direct Benefit Transfer (DBT) lyngba ka PFMS ban pynthikna ba ka jingsiew kan dei ban long kaba khuid kaba suba.
