Shillong, Jylliew, 26: Ka Petroleum Dealers Association, Meghalaya (PDAM) ha ka sngi Balang ka la kyntu ïa ki paidbah ba kin dei ban long kiba phikir bha ha kaba ïadei bad ka jingdon ka Ethanol ha ka umphniang Petrol.
Ha ka jingïakren bad ki lad pathai khubor, u President ka seng Bah Kenedy C. Khyriem u la ïathuh ba naduh u Rymphang, 2022 ka Sorkar India, lyngba ka Ministry of Petroleum ka la wanrah 10% ka Ethanol ba la khleh ha ka Petrol ha ka ri. Mynta ka Sorkar ka la sdang ban khleh haduh 20% ka Ethanol ha ka umphniang Petrol.
Kumba ka Ethanol ka dei ka Hygroscopic ha ka rukom long jong ka, ka kjit ïa ka um. Da kane ka rukom ka pynmih ïa kawei pat ka rukom long ba thymmai kaba pynmih jingeh ha ki kali.
U la ong ba Dealers Association ha kylleng ka ri baroh kawei ka la ieng pyrshah ïa ka jingleh jong ka Sorkar wat lada don tang khyndiat eh ka um ha ki Tanky jong ki kali ne ha ka top buh pynlang umphniang, kan pynmih ïa ka jingeh. Hynrei ka Sorkr ka la shna ïa kane ka petrol bad die ïa ka Ethanol ba la khleh lang ïa ka umphniang Petrol.
Ïa ka jingpynshai paidbah halor ka jingkhleh ïa ka Ethanol bad ka umphniang Petrol la pynlong ha baroh kawei ka ri ban pynsngewthuh ïa ki nongpyndonkam petrol ba kin tip shaphang ki jingeh bad kumnoh ban phikir bha ïa ki tanky jong ki kali ban ym pynieng ïa ki kali, ki scooter, bike ha ki jaka ki bym biang.
Khamtam leilei ha ka por lyiur, ki paidbah ki dei ban set bha ïa ki kali, ki scooter bad ki bike ha ki jaka kiba lait na u slap, khamtam eh ki ar shaka bad ban pynthikna ba dei ban da tap bha ïa ki tanky theh petrol khnang ba ka um kan ym ïoh rung shapoh.
U Bah Khyriem u la ong ha kaba ïadei bad ka jingwanrah ïa ka Ethanol ba la khleh ha ka umphniang Petrol, ki nongpynïaid jong ki Petrol Pump ki ju pynkhuid ïa ki Underground Tank bad pynthikna ruh ban ym don um ha ka umphniang. “Shuh shuh, ngi ju khmih bniah ruh manla ka sngi ïa ka Storage Tank ban pynkhuid.
Hynrei watla katta, khamtam ha Meghalaya kaba dei ka jaka kaba jur bha u slap, ka um kan rung beit sha ki tanky jong ki kali, khamtam ha ki thuk thuk ar shaka.
“Hynrei kaba sngewsih haba don kino kino ki jingjia khamtam ha Meghalaya, ha ka por ba jur bha u slap, lada kum kine ki jingjia ki wan jia, ki trai/nongtrei jong ki Petrol Pump ki shah teipop ba ki khleh da ka um ha ka umphniang petrol bad die pat ïa ka. Ki la don bun ki jingjia haba ki trai jong ki Petrol Pump ki la shah pynbor ban siew ïa ka bailutksan, kane ka long ka bym lah satia ban pdiang,” u la ong.
“Namarkata, na ka Petroleum Dealers Association, Meghalaya, ngi kyrpad ïa ki paidbah ba kin long kiba phikir halor kine ki jingjia nangne shakhmat,” la ong u Bah Khyriem.
