Shillong, Nohprah, 05: Ka Kashari Special Judge (POCSO), South West Khasi Hills ha ka 26 tarik, Naiwieng, 2025 ka la hukum ban set phatok ïa u Sushanto Hajong, uba sah ha ka shnong Photkroh, kaba hap hapoh ka South West Khasi Hills District halor ka jingdonkti ban leh be-ijot ïa kawei ka samla lud kaba la 15 snem ka rta kaba sah kawei ka shnong kaba dang hap hapoh ka South West Khasi Hills District.
Ka Kashari ka la daiñ kuna ruh 15 hajar ïa u Hajong bad lada um lah ban siew ïa kane ka kuna un hap ban shong along sa ar bnai.
U kyrwoh ba la phah ha ka sngi Thohdieng da u Superintendent of Police ka South West Khasi Hills District u la pyntip ba ha ka 28 tarik, Nailur, 2019 ki Pulit ki la ïoh pdiang ia ka ejahar na kawei ka longkmie na kawei ka shnong kaba hap hapoh ka South West Khasi Hills District kaba la pyntip ba ka khun kynthei jong ka, kaba la 15 snem ka rta ka la shah leh be-ijot ha u Sushanto Hajong uba la pynbor ïa ka kham hadien ba kan pynhap noh ïa i khun ba la pun.
Ki Pulit ki la register case ïa ka ejahar ha Ranikor Police Station ha ka Case No. 17(09)2019, hapoh ka Section 5(1)(ii)(1)/6 POCSO Act. Ïa ka jingtohkit la bynshet ha ka WPSI Kong J.M. Kurbah. Ynda la pyndep pura ïa ka jingtohkit bad ïoh lum lut ïa ki satar, la pynngat kyndon ïa kane ka case ha ka 31 tarik, Nohprah, 2019.
Ha kawei pat ka jingjia, ka Kashari Special Judge (POCSO), South West Khasi Hills ka la rai pynrem da kaba hukum ban set phatok 14 snem ïa u Albad Kharlyngdoh bad daiñ kuna T. 20 hajar hadien ba la lap ïa ki sakhi kiba biang ba u donkti ban leh be-ijot ïa la ka jong ka khun kynthei naduh u snem 2017 mynba ka dang don 10 snem ka rta.
Ka Kashari ka la hukum, lada u nongshah kynnoh um lah ban siew ïa ka kuna un hap ban bteng ïa ka jingshong phatok sa ar bnai.
U SP u la pyntip ba ki Pulit ki la ïoh pdiang ïa ka ejahar ha ka 30 tarik, Risaw, 2022.
Ïa ka ejahar ki Pulit ki la register case ha Mawkyrwat Police Station hapoh ka Case No. 15(10)2022 hapoh ka Section 5(1)(m)(n)/6 POCSO Act. Ïa ka jingtohkit la bynshet ha ka WPSI M. M Arengh bad pynngat kyndon ha ka 23 tarik, Naiwieng, 2022.
“Kine ki jingrai pynrem ki ieng kum ka jingpynshisha ïa ka jingaiti lut jong ki Ophisar kiba la pynlong ïa ki jingtohkit kiba bniah ban pynïoh ïa ka hok jong ki lanot,” la ong u SP.
