Shillong, Nailar, 28: Ka Kashari Special Judge (POCSO), Ri-Bhoi District ka la hukum ban set phatok 10 snem ïa ki lai ngut ki runar kiba donkti ban thmu leh be-ijot ïa ki lai ngut ki khynnah.
Ha u kyrwoh ba phah da u Sr. Superintendent of Police ka Ri-Bhoi District u V.S Rathore la pyntip ba ha ka 29 tarik Jylliew, 2017, ki Pulit ka Nongpoh Police Station ki la ïoh jingtip ba ha ka 28 tarik, Jylliew, 2017, lai ngut ki briew kiba la tip kyrteng kum u Mawri Ksing, u Sbishon Songthiang bad u Bron Prang hadien ba la shongshit khawyiang ki la thmu leh be-ijot ïa ki lai ngut ki khynnah rit.
Ki Pulit ki la register case ha Nongpoh PS hapoh ka Section 448/376D/511/354A IPC pule lang bad ka Section 9(g)/10 POCSO Act bad ïa ka jingtohkit la bynshet ha ka WP/UBSI E. Khardewsaw.
Hadien ba la pyndep ïa ka jingtohkit ïa ka jingpynngat kyndon la aiti ha ka 23 tarik, Risaw 2017.
Ka Kashari jong u Special Judge (POCSO), Ri-Bhoi District ha ka jingbishar ka la lap ba u Mawri Ksing, u Sbishon Songthiang bad Bron Prang ki donkti ha kaba leh ïa ka kam bymman bad rai pynrem hapoh ka Section 448/376D/511/354A IPC pule lang bad ka Section 9(g)/10 POCSO Act.
Ka Kashari ka la rai pynrem ïa ki lai ngut ban shong phatok na ka bynta 10 snem bad daiñ kuna T. 20,000 na ka bynta ka jingdonkti ban thmu leh be-ijot kynhun hapoh ka Section 376D/511 IPC, ban shong phatok sa 6 bnai na ka jingrung jubor ha ïing hapoh ka Section 448 IPC, ban shong phatok 2 snem bad ban siew ïa ka kuna kaba T. 1,000 namar ka jingdonkti ban leh khlemakor hapoh ka Section 354A IPC bad ban shong phatok sa 6 snem bad hap ban siew ïa ka kuna kaba T. 10,000 halor ka jingdonkti ban leh be-ijot jubor.
