Shillong, Naiwieng, 17: Ka Kashari Special Judge (NDPS) jong ka South West Khasi Hills District ha ka 11 tarik, Naiwieng, 2025 ka la rai pynrem ïa u Somison Sangma, u Gopal Borman bad ïa u Jenel D. Sangma da kaba hukum ban set phatok 10 snem bad nalor kata la daiñ kuna ruh mar 1 lak tyngka marwei bad lada kim lah ban siew ïa ka kuna kin hap ban shong phatok sa mar shi bnai.
Ha u kyrwoh ba la phah da u Superintendent of Police jong ka South West Khasi Hills, la pyntip ba ha ka 19 tarik, Kyllalyngkot, 2024 ki Pulit ki la ïoh pdiang ïa ka ejahar na u Irfan Bashir Magrey ba ha ka 19 tarik, Kyllalyngkot, 2024 ha ka por kumba 10:30 baje mynstep ki Pulit kiba ap pahara ki la ïoh bat ïa ki lai ngut ki briew kiba shong ha ki ar tylli ki thuk thuk kiba wan na Ranikor.
Hadien ba la ïoh jingtip na ki Pulit u Magistrate Bah S. Marwein, u Block Development Officer jong ka Ranikor bad ki Pulit ka Ranikor Police Station ki la leit mar mar sha ka jaka ba la ïohbat ïa kine ki lai ngut.
Ha ka jingtalasi, ki Pulit ki la ïoh kurup na ka met jong kine ki lai ngut haduh 9 tylli ki song ba la thep ïa ki 1728 tylli ki dawai kuli ba la suba ba ki dei ki kuli Yaba.
Mar mar ki Pulit ki la registered ïa ka case ha Ranikor Police Station hapoh ka Section 22(C)/29 jong ka NDPS Act bad ïa ka jingtohkit la bynshet ha u Armed Branch A. Syiemlieh.
Halor ka jingïohkem ïa kine ki lai ngut, ki Pulit ki la pynngat kyndon ha ka 3 tarik, Jymmang, 2024 bad aiti ïa ka kaipod sha ka Kashari Special Judge (NDPS) Mawkyrwat na ka bynta ban pynlong ïa ka jingbishar.
