Shillong, Risaw, 21: Ki Pulit ka East Khasi Hills District da ka jingïatreilang bad ki bor synshar district, ka tnat Khlaw, Excise bad ka Anti-Narcotics Task Force (ANTF) ha ka sngi Baar ki la pynjulor palat 10 ton ïa ki dieng Ganja ba la rep ha ha ka jingïar ka jaka kaba heh 5 hektar ha ki kyrpong iing ha ka shnong Laitlulong, Sohiong.
Ïa kane ka kynhun ki Pulit la lamkhmat da u SDPO ka Sohra u Bah Pynhun Syiem ryngkat ka jingsakhi lang jong u Executive Magistrate u Dr. CJK Warjri bad kiwei kiwei ki ophisar.
Palat 120 ngut ki Pulit na Shillong bad na Sohiong ki la mait naphang ban pynjulor ïa ki dieng Ganja ba la rep ha ka shnong Laitlulong khnang ban pynthikna ba wat uwei u dieng Ganja ruh um dei ban dang mih shuh.
U Superintendent of Police ka East Khasi Hills u Bah Vivek Syiem u la ong ba ïa ki tynrai dieng Ganja la mait lut naphang ha ki lyngkha ba la thung ha ka jingïar kaba 5 hektar. Hadien ba ladep mait lut, ïa u Ganja ba la kurup la pynjulor da kaba thang noh da ka ding khnang ban pynthikna ïa ka jingrat dyngkhong ïa u jingdih uba sniew katkum ki kyndon ba la buh,” u la ong.
U SP u la ong ruh ba ka jingrep ïa u Ganja ka long kaba be-aiñ bad yn shah pynshitom hapoh ki kyndon jong ka NDPS Act.
U Rangbah Shnong jong ka Laitlulong u Bah Lawstar Kharkrang ha ka jingïakren bad ki lad pathai khubor u la ong ba hapoh shnong ïa u Ganja ym dei ba ki da rep hynrei ki nongrep ki dei kiba ju rep bha ïa u phan hynrei u Ganja u shu mih hi kumto.
U la ong ruh ba ïa u Ganja ki nongrep ki pynlong sboh da kaba thep ha ki sem ri sniang bad masi.
Haba kylli, u la ong, “ban rep na ka bynta ban khaii ïa kata te ngam tip. Hynrei kaba ngi tip ka long ba u mih hi bad ynda u la heh ki nongrep ki thep ha sem sniang sem masi ban pynlong sboh. Dei tang kata kaba ngi tip.”
U la ong ba nangne shakhmat ki nongrep kim dei shuh ban dang ailad ïa u tynrai dieng Ganja ban mih ha ki kyrpong iing bad ha ki lyngkha rep phan namarba u dei u jingthung ba la kheiñ be-aiñ.
U Bah Kharkrang u la kyntu ruh ïa ki paidbah ka shnong Laitlulong bad ïa ki shnong ba marjan ba kim dei shuh ban rep hynrei ki dei ban jynrat naduh ka por ba u tynrai dieng Ganja u dang sdang ban mih.
