Shillong, Nailar, 27: U MDC ka BJP na Tura u Bernard N Marak ha ka sngi Balang u la kynnoh ba ka la don ka jingpyndonkam bakla kaba jur ïa ka pisa da ki Political Committee khamtam ki Executive Committee ha ki lai tylli ki Autonomous District Council (ADC).
Ha u kyrwoh, u Marak u la pynpaw ïa ka jingsngewkhia halor ka jingpynslem ban aiti ïa ki Utilization Certificate (UC) kaba la pynsah pongding ïa ki jingpynlait pisa kaba kot T.500 klur tam sha ki lai tylli ki ADC ha Meghalaya.
U la ong ba hapdeng ki snem 2021-26, ka Finance Commission jong ka Ri India ka la mang T.8,000 klur tam na ka bynta ki ADC- KHADC, JHADC bad GHADC lyngba ka 15th Finance Commission.
“Hynrei kaba sngewsih ka long ba ka la don ka jingpyndonkam bakla/jingpynïaid bakla kaba jur ïa ka pisa ha ki ADC da ki Political Committee, khamtam da ki Executive Committee,” u la ong.
U Marak u la kynnoh ba ïa ka jingïarap ba kyrpang kaba T.100.71 klur ba la mynjur hadien ba la soi ïa ka Garo Accord ha u snem 2014 la “lute” na ka GHADC.
“Ki don ki dkhot kiba la sei bun bha ka pisa ha ki lyngkhot lyngkhai na ka tnad Pla Tyngka jong ka Council. Mynta ki nongtrei ki mad jingeh namar ka jingsahkut tulop kaba la slem haduh 43 bnai khamtam namar ba ïa kine ki pisa ym shym la pyndonkam hok ha ki projek kiba pynmih khajna,” u la ong haba bynrap “baroh lai tylli ki ADC jong ka Meghalaya ki la ïoh jingmyntoi kham bun na kane ka jingïateh kular.”
U MDC u la pynpaw shuh shuh ba ka jingpyndonkam bakla da ka EC ka la khring ïa ka jingbishar bniah ïa ka Para 7.6 jong ka Accord kaba pynthikna ïa ka jingpyndonkam hok ïa ka pisa da kaba kiar na ka jingpyndonkam bakla bad jingpynïaid bakla ïa ka pisa jong ka Sorkar Pdeng.
“Hynrei bun na ki projek kiba la mang hapoh ka T. 100.71 klur ki don mynta hapoh ka jingbishar ha kano kano ka iingbishar namar ka jingbamsap ne la pynngat mukotduma ne la iehnoh shiteng lane lehse la shu jah noh na ka jaka jong ka projek. Ïa ka jingïateh la pynkheiñ bad ban lait na ka jingkitkhlieh ka jingïalang kaba manla ka 6 bnai jong ka Monitoring Committee ym shym la pynlong shuh hadien u Covid-19. Namarkata, ym don mano mano ruh ba lah ban ong ba kam don ka jingpyndonkam bakla ïa ka pisa ba la mang da ka Sorkar Pdeng,” u la bynrap.
