Shillong, Lber 12: U Symbud Lamphang jong ka Iingdorbar Thawaiñ ka Jylla Timothy D Shira ha ka sngi Balang u la mudui da ka bai mynraiñkhmat ïa ki arngut ki riewpaidbah kiba la kren lamler da kaba pynthohbria ïa u da kaba kynnoh ba u pyrshah ïa ka jingdawa ban pynlong ïa ka sor Tura kum ka Winter Capital, West Garo Hills District ha ka Social Media.
Ïa ka Defamation Case la ujor pyrshah pyrshah ïa ka Mikkanchi R Sangma na Darangiri, Goalpara District, Assam bad ïa u Balsrang Marak na Thapa Darenchi, North Garo Hills hakhmat ka Kashari jong u Chief Judicial Magistrate, Shillong.
Haba kren sha ki lad pathai khubor, u Shira u la ong, “nga la mudui da ka Criminal Defamation Case pyrshah ïa ki arngut ki briew namarba ki la pynsaphriang lamler ha ka YouTube halor ka jingkren jong nga ha Assembly ha kaba ïadei bad ka jingpynlong ïa ka Tura kum ka Winter Capital.”
“Khlem da tip bniah ïa ki jingshisha ïa kaei kaba nga la kren hapoh ka Iingdorbar Thawaiñ, ki la pynmih ha ka YouTube nga ka long pyrshah ïa ka jaidbynriew jong nga, ba nga pyrshah ban pynlong ïa ka Tura, ka winter capital bad nalor kata u la ong ba un pynrem ïa nga ba ngam ïatreilang bad ka jaidbynriew lajong,” u la bynrap.
U muktiar jong u Shira ula bynrap, “mynta ka sngi ngi la mudui ar tyllli ki mukotduma, kawei ka dei ka Defamation bad kawei ka dei ka Criminal Defamation. Ha ka Criminal Defamation Case lada kim lah ban pynshisha ïa ki jingkynnoh ki lah ban shah pynshitom katkum ki kyndon jong ka aiñ leh kam bymman bad ngi la mudui ruh sa kawei ka Defamation Suit ban kam ïa ka jingshah pynjah burom kaba kot 100 klur kine ki arngut bad kane ka dei namarba ki la pynphriang bym dei ïa kaei kaba u Symbud Lamphang u la kren hapoh ka Iingdorbar Thawaiñ.”
“Kawei na ki nongshah mudui ka dei na Assam, u bym don bynta eiei bad ka Jylla Meghalaya. Ka la ïalam bakla ïa ka jingkren kaba la kren ha Iingdorbar Thawaiñ ha ka rukom kaba pher bad kaba la pynjah burom ïa u nongujor jong nga hapoh ka Constituency jong u, ha rilum Garo bad kane ka la pynlong ïa u ban leh da kaba tyngeh ïa ki arngut ki briew bad na kata ka daw u la leit sha Kashari ban mudui da ki ar tylli ki Defamation Case,” u la bynrap.
