Shillong, Nailur, 09: Ki nonghikai jong ki skul SSA kiba don hapoh ka shatri jong ka All Meghalaya SSA Schools Teacher’s Association (AMSSASA) ha ryngkat ka jingïatreilang bad ka All Garo Hills SSA Schools Teacher’s Association (AGHSSASTA) ha ka jingïalang kaba la long ha 7 tarik mynta u bnai ha Nongstoiñ, West Khasi Hills District ki la rai ban dawa ïa ka Sorkar Jylla ba kan kyntiew noh ïa ka jingsiew tulop jong ki nonghikai SSA kaba kynjoh haduh 100 percent.
Ha ka jingïalang kaba la long hapoh hapoh Hall jong ka School Mount Hermon ha Nongstoiñ, la ïashim bynta lang da u President jong ka ka AMSSASTA Sengkmie u Peter Thyrniang, u Assistant Secretary u bah Wanpyndaphi Langpang bad u President jong ka AGHSSASTA u Labingstone G Momin, u General Secretary u Benabith Marak bad ki nongkitkam na baroh ar tylli ki synjuk jong ki nonghikai na kylleng ki District.
U Bah Peter Thyrniang haba ïakren bad ki lad pathai khubor u la ong ba na ka liang jong ki nonghikai skul SSA jong kine ki ar tylli ki kynhun hadien ba la ïatai sani halor ka phang ban kyntiew ïa ka jingsiew tulop da kawei ka sur ki la ïashim ïa ka rai ban dawa na ka sorkar ba ka dei ban kyntiew noh ïa ka jingsiew tulop kaba 100% ha kaba kin ai por hapoh une u bnai Nailur hynrei lym kumta kine ki ar seng kin pynlong da ka jingïakhih shong kyllaiñ myngngor khlem buh por.
