Shillong, Nailar, 30: Arngut ki MLA barim ka Congress kiba la pynïasoh dang shen sha ka National People’s Party (NPP), ki la shah thung kum ki Adviser ha ki tnat treikam bapher bapher jong ka Sorkar Jylla.
U MLA ka Umsning Dr Celestine Lyngdoh u la shah thung kum u Adviser jong ka tnat Kam Pohiing bad ha ka tnat Pule Puthi bad u MLA ka Nongstoiñ Bah Gabriel Wahlang u la shah thung kum u Adviser ha ka tnat Mining and Geology bad ha ka tnat Public Health Engineering naduh ka tarik ba ki la shimti ïa ka kam tad haduh ban da pynbna da kumwei pat bad kin ioh ruh ïa ki jingmyntoi hapoh ka kyrdan “A+”.
Ïa ka jingpynbna la pynmih ha ka sngi Thohdieng.
Da ka jingthung Adviser ia kine 2 ngut kata ia u Dr. Celestine Lyngdoh bad u bah Gabriel Wahlang mynta ka jingdon ki Adviser jong ka sorkar ka la poi sha ka 11 ngut. Katkum ka jingpynbna ba ka sorkar ka la pynmih ha u rymphang 2024, ki don 9 ngut ki Adviser kata kiba hap ha ka A Plus Category ki kynthup ia u bah Lahkmen Rymbui, u Dr. DD Lapang, u bah Hamletson Dohling, u bah Banteidor Lyngdoh, u bah Renikton Lyngdoh Tongkhar bad u bah Gavin Miguel Mylliem katba u bah HM Shangpliang pat ha ka Category A bad 2 ngut kiwei pat kata u Dr. Jemino Mawthoh bad u Subodh Menon ki dei kiba hap ha ka Honorary Basis.
