Shillong, Jylliew, 12: Ki lai ngut ki paralok jong u Raj Kushwawha u baieid jong ka Sonam Raghuvanshi ki la phla ha ki Pulit ba ki la thmu ban pynïap ïa u Raja Raghuvanshi ha Guwahati, Assam. Hynrei namarba ka jingthmu kam shym la urlong ha Guwahati ka Sonam ka la khroh ïa u kurim da kaba pynbiej ban leit kai noh sha Shillong bad Sohra nangta sha Dawki.
U Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor ha ka sngi Palei u la ong, “ngi la sdang ïa ka jingtohkit mynta ka sngi. Ki san ngut ki la phla ba ki dei kiba donkti ha kane ka kam ba la pynïap ïa u Raja Raghuvanshi ha Wei Sawdong.
Ïa ka met ba la lam pyut jong u Raja Raghuvanshi la lap ha ka 2 tarik, Jylliew ha mot Arliang kaba don hajan Wei Sawdong, Sohra.
“Ïa u Raja Raghuvanshi la pynïap hapdeng ka por 2:00-2.18 baje noh sngi,” la ïathuh u SP.
“Ki la phla ba ïa kane ki la ïasylla ha Indore naduh khatwei sngi shwa ban ïathoh (hapeng ka Sonam bad u Raja Raghuvanshi). Kane ka dei ka buit jong u Raj Kushwaha u baieid jong ka Sonam bad u la phah ïa ki paralok u Vikash Chauhan, u Anand Kurmi bad u Akash Rajput naduh ka 19 tarik Jymmang, 2025. Ki (lai ngut) la poi ha Guwahati bad sah ha kawei ka Hotel bad ki la wad ïa kano ka jaka ban pynïap ïa u Raja Raghuvanshi. Kata ka kam ka khlem urlong naba ki bun briew ne ka jngai na kata ka jaka. Hadien kata, haba ka Sonam ka tip ba ka kam ka khlem urlong ha Guwahati ka la ong ha u kurim ban ïa leitkai noh sha Shilong, Sohra,” la ïathuh u SP.
“Ki lai ngut (Vikash Chauhan, u Anand Kurmi bad u Akash Rajput) ruh ki la wan sha Shillong bad ki la shim wai ar tylli ki motorbike bad ki shikurim (Raja Raghuvanshi bad ka Sonam) ki la poi sha Nongriat da ka thuk thuk. Ha ka miet 22 tarik, Jymmang, 2025. Ki lai ngut (ki paralok u Raj Kushwaha) ki la sah ha kawei ka Home Stay ha Nongriat bad ka la don ka jingthmu ha ka miet 22 tarik, Jymmang, 2025 ban pynïap ïa u Raja Raghuvanshi hynrei ka la don ka jingeh ha kaba kim don jaka ban bret ïa ka met. Ka la pulom noh bad ki la pyrshang noh hapdeng ka Mawlakhiat bad Wei Sawdong katba u Raja u dang leit pynjhieh, hynrei ha kata ka por ki khlem ïohlad satia,” la thuh shuh shuh u SP.
Khatduh ha Wei Sawdong, ki lai ngut ki la ïoh rung shwa ha Wei Sawdong bad u Raja Raghuvanshi uba la ithuh ïa ki lai ngut sha Nongriat lyngba ka Sonam. Ki lai ngut ki ladep tip lypa ïa ka jingthmu ba sniew sha lyndet. Ka Sonam ka la ong ïa u kurim ban leit kai sha Shilong, Sohra bad Dawki. Ha ka por ba la ïakynduh ïa ki ha kata step ki (lai ngut) ki la ong ban leit kai sha Dawki. Ka jingïasngew paralok ka la kham sngewjan na ka liang jong u Raja Raghuvanshi bad ki lai ngut ki paralok u Raj Kushwaha.
“Ynda poi ha Wei Sawdong ki lai ngut ki rung noh sha Parking Lot katba u Raja Raghuvanshi bad ka Sonam ki dang don shadien. U Raja Raghuvanshi u la ïaid sharum shaneng ban wad ïa ki (lai ngut) tad haduh ba un da lap ïa ki ha Parking Lot ha Wei Sawdong. Ha Parking Lot katba ki dang ieng kai, ki lai ngut ki la mait ïa u Raja Raghuvanshi uwei hadien uwei, ka Sonam ruh ka don hangta,” la ïathuh u SP ïa ka jingphla jong ki nongleh kam bymman bad bynrap, “ïa ka snam ba la jaw ha khyndew dei ka Sonam kaba la khat bad bret sha riat. Ka Sonam ka la ai noh ha ki lai ngut ïa ki ksiar ba kin rah sha Indore bad ka pisa.”
Shuh shuh u SP u la ïathuh ba dei ka Sonam kaba la ñiah hi ïa ka Scooty haduh AB Viewpoint. Ïa ka jaiñ jri kaba iong kaba phong u Akash u la kawang noh sha surok kaba ym da jngai 5-10 mitar bad ïa kata ruh ngi la kurup. “Nangta ka (Sonam) leit shong noh bad u Akash bad dei u Anand Kurmi uba leit buh ïa ka Scooty ha Sohra Rim,” u la ïathuh.
“Nangta ka (Sonam) la phong noh da kawei ka jaiñ ba ki la ai ïa ka bad hakhmat ka Lad Mawphlang ka la shim noh da kawei ka Taxi ban wan sha Shillong bad na Shillong ka la shim sa ka kali Tourist ban leit sha Lokhra ISBT. Na Lokhra ISBT ka la kiew da ka bos haduh Siliguri bad na Siliguri ka la kiew da kawei pat ka Bos haduh Patna bad na Patna sharuh Ara bad na Ara ka la kiew da ka Train sha Lucknow bad na Lucknow ka la kiew da ka Bos sha Indore. Ha Indore ka la poi ha ka 26 tarik Jymmang, 2025 bad hadien ba ka la mih ha ki kot khubor ba uwei na ki Guide na Nongriat u la ïohi ïa ki lai ngut bad kane ka la saphiang ha ki lad pathai khubor. Ki (lai ngut ki paralok u Raj Kushwaha) la don ka jingsheptieng bad ka Sonam ka la mih noh da kawei ka kali ba la pynbeit da u Raj Kushwaha ban phet biang sha Siliguri bad ha Siliguri kan ai daw ba ka shah batbor bad ka laïoh phet nangta,” la bteng u SP ban ïathuh ïa ka jingphla ki saw ngut.
“Ha ka 8 tarik, Jylliew, 2025 ki Pulit ka Meghalaya bad SIT ki la poi sha Indore. U Raj u la ïoh ïa ka khubor ba u Akash u la shah kem ha ki briew ki bym ithuh kiba phong civil dress. U Raj u la shu ong noh ïa ka Sonam ban shu leit noh sha kano kano jaka ban ong ba ka la shah rahbor bad ban pan jingïarap hynrei ka (Sonam) khlem poi pyrkhat ba ha kato ka sngi hi kan don ka operation (jong ki Pulit ka Meghalaya) ha ki ar tylli ki jylla,” u la bynrap.
Haba kylli, u SP u la ïathuh ba ïa ki lai tylli ki Scooty la shim wai na Keatinge Road.
U la ong ruh ba ki Pulit mynta kin dang ïai bteng ban tohkit ïa ka jingïakren lyngba ka telephone hapdeng ka Sonam bad u Raj Kushwaha uba bthah ïa ki lai ngut kumno ban pyndep ïa ka kamram ba la bthah. “Ïa kata ngi dang tohkit ngim pat lah ban ïathuh bniah. Ka jingtohkit ka dang dei kaba nyngkong bad lehse ka jingïathuh ka la lah ban kylla noh. Ïa mynta hi ngi lah ban ïathuh ba ki lah phla,” u la ong.
Haba kylli shuh shuh, u la ong ba kane ka case ka dei ka bym lah ban ïoh jamin.
U SP u la ïathuh ruh namarba ka jingshah pynïap u Raja Raghuvanshi ka la jia ha Sohra, kane ka case ka dei kaba la register ha Meghalaya bad yn tohkit ruh nadong shadong da ki Pulit ka Meghalaya ym da ki Pulit ka Madhya Pradesh. “Ki (Pulit ka Madhya Pradesh) ki lah ban shu ai jingïarap ïa ngi ha ka jingtohkit lada ngi donkam,” la pyntip u SP.
