Shillong, K’lyngkot 07: Ka Hynñiewtrep Border Disputed Redressal Forum (HBDRF) ka la kyntu ïa u Myntri Rangbah ka Jylla u Conrad K. Sangma ba un ïakren bad ka Sorkar Assam ba kan pyndunna ïa ka jingoh khajna na u synsar
Ha ka shithi ba la phah sha u Conrad, ka Forum ka la ong, “ha ka kyrteng jong ki paid Khasi Pnar kiba shah ha Block -I & II, ngi kyrpad ïa phi ban shimkhia ïa kane ka kam da kaba ïakren bad u Myntri Rangbah ka jylla Assam ban pynhiar ïa ka jingoh khajna na u synshar.”
Ka la ong ba ka Sorkar Assam kam ithuh satia ïa u synsar kum u mar rep hynrei ka ñiew beit kum u mar khlaw.
“Namarkata ka la plie kabu ïa ka tnat khlaw jong ka Sorkar Assam bad ïa ka tnat Forest jong ka Karbi Anglong Autonomous Council ban oh da ka khajna kaba heh ïa u synshar bad kumba ka long mynta ka jingoh khajna ïa u synsar ka long T. 12, 000 hajar haduh T. 15, 000 hajar shi kali Mahindra Bolero Pick-up Truck,” la ong ka shithi na ka Forum bad bynrap, “na ka daw ka jingsniew palat ka surok ki kali Pickup truck ki lah ban kit tang 1.2 metric tons, kata, tang 1200 kilo katba ka jingshah oh khajna ka long T. 10 haduh T. 12 shi kilo. Kane ka jingshah oh khajna ka la pynduhnong ïa ki Khasi Pnar kiba sah ha Block -I & II bad ki jingtrei shitom ki shu long lehnohei.”
“Ngi kyrpad ïa phi ban tuklar mardor ïa kane ka kam shwa ban poi ka por ban die ïa u synshar mynta u bnai khnang ba ki nongrep jong ngi kiba sah ha ki jaka ba don hapdeng ka jingïakajia pud kin ïoh ïa ka dor kaba ki dei hok ban ïoh,” la ong shuh shuh ka Forum.
