Shillong, Jylliew, 26: Ka ophis Customs (Preventive) North Eastern Region kaba la ïakhun pyrshah ïa ka jingkhaïi drok ka la pynjulor da kaba thang da ka ding ïa ki jait drok ba la ïoh kurup ha Assam, Manipur, Meghalaya bad Mizoram
Katkum u kyrwoh ba la phah sha ki lad pathai khubor, ki jait drok ba la pynjulor ki long 12.48 kilo u drok Heroin, 45.27 kilo ki dawai kuli drok Meth/Yaba, 5804.78 kilo u Kynja bad 66728 bilor ki dawai jyrhoh ba don Codeine kiba kot palat T. 167.47 klur.
Ïa kane ka kam la leh ha ka rukom kaba shngaiñ bad ka bym ktah ïa ka mariang da kaba pynthikna ba kine ki mar ba pynsniew yn ym ïohlad ban pynïaid iew shuh.
Kane ka jingai jingtip jong ka tnat Customs (Preventive) North Eastern Region ka long kum shi bynta ka jingrakhe ïa ka International Day Against Drug Abuse and Illicit Trafficking lyngba ki prokram ai jingtip bad ki kam ban pynjulor ïa ki jait drok ba la ïoh kurup.
Ka tnat Customs ka la pyntip ruh ba ka la pynlong ïa ki jingpynsngewthuh paidbah bad ka jingpynjulor ïa ki jait drok ba la ïoh kurup ban pyni shuh shuh ïa ka jingkut jingmut ban ïaleh pyrshah ïa ka jingpyndonkam bad ka jingshalan ïa u drok.
Shi taiew mynshwa, ka tnat Customs ka la pynlong ïa ki jingpynsngewthuh ha Kendriya Vidayalaya GC, Agartala, ha Government Boys Higher Secondary School, Dhubri bad ha Govt. Chawnpui High School, Aizawl da ka jingthmu ban ai jingtip ïa ki khynnah skul shaphang ki jingma kiba wan na ka jingpyndonkam ïa u drok, ka jingkongsan ban im ka jingim kaba koit ka khiah bad ka jingkiar ïa ki drok.
Ka tnat Customs ka la pynlong ïa ki jingpynshai paidbah ha KRIPA Foundation De-Addiction Centre for Children, Shillong bad ha New Hope De-addiction cum Counselling Centre, Shillong ha ka 25 tarik bad 26 tarik mynta u bnai.
Ïa ki kamram bad ki sienjam jong ka tnat la pyni bad ka la don ruh ka bynta bad ka Dr. Jasmine M Lyngdoh, Clinical Psychologist bad Director, Routes, Shillong ka la ai jingkren shaphang ka jingktah na ka jingdih drok, ka jingdih kyiad bad ka la ai jingmut ruh shaphang ki lad ki lynti ban lait na kane ka jingkyrni.
La sam ruh ïa ki tiar ïalehkai sha ki nongpang ban kyntiew ïa ka koit ka khiah jong ki.
Ka tnat Customs ka ieng skhem ban ïada ïa ka imlang sahlang na ki jingma kiba wan na ka jingpyndonkam bad jingshalan ïa ki jait drok da kaba pynlong ïa kine ki prokram ai jingtip bad ka jingpynduh ïa ki jait drok. Ka tnat Customs ka thmu ruh ban pynduna ïa ka jingpyndonkam ïa ki jait drok bad ban ai jingkyrshan ïa ki sienjam ha kylleng ka pyrthei ban ïaleh pyrshah ïa ki kam khaïi drok.
