Shillong, Nailur, 04: Khat-ar ngut ki nongkhaii drok kiba la shah kem ha ki Pulit ka Jylla Meghalaya na ki bynta bapher bapher jong ki hynñiew tylli ki District ka rilum Khasi bad Jaiñtia ki la shah rai pynrem ha ka Iingbishar da kaba shah set along namar ki kam bymman ba ki la leh.
Ïa kane la pyntip da u Secretary ka Education Cell ka HYC Bah Enlang Sawian ha ka jingïakren bad ki lad pathai khubor ha ka sngi Balang u la ai jingtip halor ka jubab RTI kaba la pan da ka seng naduh u snem 2020 haduh u snem 2024 na ka tnat Kam Pohing ka Sorkar Jylla.
Katkum ka jubab RTI, ka tnat Kam Pohing ka la pyntip ba ha ki saw snem, kata naduh u snem 2020 haduh u snem 2024 ki don 514 ngut ki briew kiba donkti ban khaii be-aiñ ïa u drok ki la shah kem ha ki Pulit jong ka Jylla Meghalaya bad ki case kiba la register da ki Pulit ha ki hynñiew tylli ki District hapoh ka NDPS Act ki long 303 tylli bad ki Case kiba la pyllait noh na ka NDPS Act, noh ki long 283 tylli.
“Na ki 514 ngut ki nongkhaïi drok kiba la shah kem ha kine ki khyndiat snem hynrei tang 12 ngut kiba la shah rai pynrem ha ka ïingbishar. Dei halor kane ka nongrim ngi ïohi ba ki nongkhaïi drok hapoh ka Jylla ki shlur ban ïai bteng ïa ka kam khaïi drok jong ki,” ong u Bah Sawian uba dei ruh u Muktiar.
U la kren bynñiaw ruh ba ka jingjyllei jong u drok hapoh ka jylla ka dei namar ka jingbym lah ban tehlakam da ka tnat Kam Pohing ka Sorkar Jylla namar ka jingdkoh treikam. “Lada ngi ïanujor ïa ka jingdon jong ki nongdih drok hapoh Meghalaya ka long haduh 3 lak ngut hynrei lada ngi peit pat ïa ka jingrai shah pynrem ka long tang 12 ngut,” ong u samla Sawian.
Ka jubab RTI ka la pynpaw ba ka jingïoh kurup jong ki Pulit ïa u drok ka long 10.844 kilo ha East Khasi Hills, 14.48 kilo ha East Jaiñtia Hills, 285.59 gram, 5.97 kilo ha Ri Bhoi District, 9.02 kilo ha West khasi Hills, 10,58 gram ha South West Khasi Hills, 2 gram ha Eastern West Khasi Hills.
“Ka tnad Pulit ka la ïoh kurup ïa u drok Herion ha rilum Khasi bad Jaiñtia ha ki 4 snem ba la leit noh ka long haduh 40 kilo tam hynrei katkum ka RTI ba la ïohpdiang ka pynpaw ba tang 1.322 kilo la pynjulor da kaba thang ïa u drok,” u la ong.
Haba buh jingkylli ïa ka Sorkar bad kumjuh ïa ka tnad Pulit halor ka jingbym pat thang ïa u drok ba la ïoh ban kurup utei u nongïalam ka HYC u la ong, “kane ka la buh ïa u dak jingkylli uba khraw bha ba lehse ha lyndet jong kane baroh ki don mano-re-mano kiba baheh-bahaiñ kiba la donkti ban pynïaid ïew bad die ïa une u drok uba la ïoh ban kurup.”
“Ngi kwah ban buh jingkylli shaei uba tam jong une u drok phi buh? Ki paidbah ruh ki sah hapdeng ka umdum namarba kim tip shaei u drok uba bun u don bad wat ki mukotduma ruh la pyllait haduh 238 tylli,” la buh jingkylli u samla Sawian.
U la ïathuh ruh ba katkum kane ka jubab RTI, ka Sorkar Jylla ka la mang pisa T. 6.90 klur na ka bynta ban pynlut ha ka jingïakhun pyrshah ïa u drok hapoh Meghalaya bad haduh mynta ka Sorkar Jylla la pyndonkam haduh T. 6, 67, 06,132 klur
“Ka jubab RTI ka pynpaw ba na ka pisa kaba la mang ban ïakhun pyrshah ïa u drok ka Sorkar Jylla ka la pynlut ha ka DREAM projek kaba kot T. 1 klur bad ka Sorkar Jylla ka la pynlut ruh na ka bynta ka jingrakhe ïa ka sngi pyrshah drok ne ka ‘Anti Drugs Day’ kumba T. 20 lak bad kumjuh ka la pynlut ruh ha ki prokram ‘Intervention Program’ kumba T. 4, 58, 74 klur. Nalor kane la pynlut ruh T. 28, 2000 lak ban ai jingïarap ïa ki jaka ai Rehabilitation Centre ba la pynïaid da ki kynhun shimet hapoh ka Jylla,” la pyntip u Bah Sawian.
U la pynpaw ruh ka jinglyngngoh halor ka jingbym ai ka Sorkar ïa ka jubab kaba biang ba kumno la pynlut ïa ka pisa kaba la mang.
“Ka seng ka la suba jur ba ka don ka jingbamsap da mano-re-mano ïa kane ka pisa kaba la mang ban ïakhun ïa u drok,” la kynnoh une u nongïalam ka HYC.
