Shillong, Jymmang, 01: Haduh 13,000 tylli ki kali rim nangne shakhmat kin ym ïoh shuh ban dang ïaid ha surok ka jylla Meghalaya hadien ba ka Sorkar Jylla ka la wanrah ïa ka Vehicle Scrappage Policy ia kaba la shim rai da ka jingïalang jong ka Kynhun Myntri kaba la long ha ka sngi Palei.
Ha ka jingïakren bad ki lad pathai khubor, u Nongai ktien jong ka Sorkar Jylla Bah Paul Lyngdoh u la ïathuh ba ka Sorkar ka la shim ia kane ka sienjam ka long ban pynduna ïa ka lyer jaboh kaba ju mih na ki kali kiba la rim.
Da kaba batai bniah halor kane, u Bah Paul Lyngdoh uba long ruh u Myntri jong ka Sorkar Jylla u la ong ba haduh mynta na ki 13,000 tylli ki kali rim kiba ngat ha ka thup ban ym shah ïaid shuh ha surok ynda la pyntrei kam ïa ka policy, haduh 5,000 tylli ki dei ki kali Sorkar bad 8,000 tylli pat ki dei ki kali jong ki riewshimet.
“Ki kali kiba la rim kiba ym ïahap shuh ban ïaid ha surok ki ngat ha kane ka polisi,” u la ong.
U la ong ruh ba ba na bynta ki kali Sorkar ki kali kiba la dap 15 snem shajrong ki la ngat ha kane ka polisi. Katba na bynta ki kali shimet kito kiba la dap 35 snem shajrong ki la shah kynthup lang ha kane ka polisi.
Shuh shuh u la ong ruh ba haduh mynta tang ha Shillong ki la don haduh 2,76,262 lak tylli ki kali khlem da kheiñ lang ia ka Jowai bad Tura.
“Kumta, mynta ngi la sdang ban shimkhia ïa kane ka kam kaba ktah bad ïadei bad ka jingjaboh ka lyer kaba mih na ki kali,” ong u Bah Paul.
