Shillong, Nailur, 06: Ka tnat Pulit pynïaid kali jong ka Shillong Traffic Police ka la ioh lum pisa 13 lak, 35 hajar tyngka ha ka jingdaiñ kuna ïa ki kali kiba tah iit ïong naduh ka 1 tarik, Naitung, 2024 haduh ka 6 tarik Nailur, 2024.
Ha u kyrwoh ba la phah da u Superintendent of Police ka East Khasi Hills District u Bah S. Nongtnger u la ïathuh ba ka jingdain kuna ïa ki kali kiba tah iit ïong ka long katkum ka jingpyntreikam ïa ka hukum ba la pynmih da ka Ingbishar Supreme Court kaba la mana ban tah platic rong ïong ïa ki iit jong ki jingkhang kali.
U SP u la ïathuh ba ka jingioh lum ïa kane ka pisa da ka tnat Pulit pynïaid kali ka long na ka jingdain kuna ïa ki 1,788 tylli ki kali ha kine 2 bnai tam.
Ka Shillong Traffic Police ka la kyntu ïa ki trai kali ba kin kiar na kaba pyndonkam ïa ki platik rong ïong ban tah ha ki iit jingkhang kali bad kiba ladep tah ruh ki dei ban tar noh mardor.
U SP u la maham ruh ba ka jingdain kuna ïa ki trai jong ki kali ba tah iit ïong bad ïa kiba pynkheiñ ïa ka Motor Vehicle Act kan dang ïai bteng beit manla ka sngi bad kino kino kiba pynkheiñ ïa kane ka jingbthah kin ngat ha ka jingshah pynshitom katkum ki kyndon jong ka aiñ.
