Shillong, Jymmang, 16: U MLA jong ka Mawkyrwat Bah Renikton Tongkhar ha ka sngi Thohdieng u la leit jurip ïa ka jingtei ïa ki jaka sah jong ka tnad ka Koit ka Khiah ha Laitlawsang, Mawkyrwat bad jong ka tnat Water Resources kiba la sah teng mynta la palat 13 snem ha kaba ki kontraktor ki la iehnoh ïa ka kam khlem da trei pyndep.
U Bah Renik u la leit jurip ruh ïa ka jingïaid shaphrang jong ka jingshna ïa ka jaka buh mar ne warehouse jong ka tnat ka koit ka khiah ha kaba ïa ka jingtrei la lah ban pyndep palat 70% bad nangne pat u la leit jurip sa ïa ka jingtei kaba dang shu dep shna shen jong ka ophis jong u Executive Engineer, Water Resources ha Mawkyrwat.
Ïa u Bah Renik la synran lang da u District Medical & Health Officer jong ka South West Khasi Hills District u Dr. F.R. Lartang, u Executive Engineer ka tnat Water Resources Bah D.P. Muktieh, u Block Development Officer ka Mawkyrwat Block Bah I. Lawriniang bad kiwei kiwei ki ophisar.
