Shillong, Jylliew, 19: Ka Sonam Raghuvanshi bad ïa u samla jong ka u Raj Singh Kushwaha ha ka sngi Saitjaiñ ka la phah set 13 sngi ha Judicial Custody hadien ba ka Special Investigation Team (SIT) ka la pyndep ïa ka jingtohkit kaba shiphew sngi halor ka jingkynnoh ba ki donkti ban pynïap ïa u Raja Raghuvanshi dang shen ha Sohra.
“Kiba shah kynnoh (ka Sonam bad u Raj) la rah tian bishar mynta ka sngi ha Kashari hadien ba ka jingset ïa ki ha along ki Pulit ka la kut. Baroh arngut kiba shah kynnoh la phah set 13 sngi ha Judicial Custody,” la ïathuh u Assistant Public Prosecutor u Tushar Chanda ha ka jingïakren bad ki lad pathai khubor shabar ka Kashari jong u Chief Judicial Magistrate (CMJ).
U Chanda u la pyntip ba ki Pulit kim shym la pan bor shuh ban set ïa kine ki arngut kiba la shah kynnoh.
“Ki (Pulit) shu kyrpad ban ai Judicial Custody bad hadien ba la shong bisar, ka kashari ka laa aibor ban set 13 sngi ha Judicial Custody ïa ki arngut kiba la shah kynnoh,” u la bynrap.
Katkum ka jingong jong u Chanda, ym shym la don ba mihkhmat na ka liang jong ki nongshah kynnoh.
Ha ka sngi Palei, lai ngut kiwei pat kiba la shah kynnoh donkti lang, u Akash Rajput, u Vishal Singh Chauhan bad u Anand Kurmi la phah set 14 sngi ha Judicial Custody,
Ha ka sngi Baar, ka SIT ka la lah ban pyndep pura ïa ka jingpynwandur ïa ka jingpynïap ïa u Raja Raghuvanshi ha kaba ka la ïoh kurup ruh sa kawei ka wait kaba ar kaba la pyndonkam kum ka tiar pynïap briew na kshaid Wei Sawdong.
