Shillong, Naitung 18: Ki bor synshar jong ka West Khasi Hills, ki ladep pynpra ïa ki Atoskhana jong ki 13 tylli ki coke plant beaiñ kiba don hapoh u pud u sam jong ka District bad hapoh 30 sngi la buh thong ban pynpra lut ïa ki 57 tylli ki coke plant beaiñ mynta ka kynti.
Ïa kane la pyntip da u Deputy Commissioner jong ka West Khasi Hills District ha u kyrwoh ba la phah sha ki lad pathai khubor ha ka sngi baar.
U DC u la pyntip ba ki bor synshar District ki la ioh kem haduh hynriew ngut ki briew kiba dei ki trai jong kine ki Coke Plant beain ïa kiba la register case hapoh Shallang Police Station hapoh ka Section 188/34/379/120BIPC bad ka Sec 15 Environment (Protection)Act, Sec 3 jong ka Explosive Substances Act bad Sec 51(1), Benami Transaction (Prohibition) Act, 2016.
Kine ki 6 ngut ki kynthup ïa u Youdishthra Bham na Assam, u Ashish Arya na Guwahati Assam, u Khrawbok Rongrin na Shallang, u Hopeful Nongtdu na Rymbai Synrang, East Jaiñtia Hills, u Yaman Bansal na Beltola, Guwahati Assam bad u Eras Dkhar na Nongstoiñ, West Khasi Hills.
U DC u la pyntip ba ki Atoskhana jong ki coke plant beaiñ ba ladep pynpra ki don ha Nonglangpar (Kyllonmathei) kiba don ha ki co-ordinate (i) 25.5220613, 90.9035105 (ii) 25.5224573, 90. 8992605 (iii) 25.5201515, 90.9032912 (iv) 25.5185800, 90.9041877 (v) 25.5174384, 90.9062416 (vi) 25.5128946, 90.9028738 (vii) 25. 5138295, 90.9038863 (viii) 25.5146504, 90.9051718 (ix) 25.5146671, 90.9067402 (x) 25.5177594, 90.9006992 (xi) 25.5191951, 90.9023759 (xii) 25.5214483, 90.9009416 bad (xiii) 25.5212888, 90.8993075.
Kum ban shu pyntip, ki don 57 tylli ki coke plant beaiñ hapoh ka thaiñ Shallang bad ki bor synshar District, ki ladep ban khang tala ïa kine ki karkhana saiñ dewiong naduh u Nohprah 2022 hadien ka jingbthah jong ka Meghalaya High Court.
U la pyntip ba ha u bnai Rymphang haduh u bnai Ïaiong 2023, ki bor synshar District ki la pynpra lut ïa ki jaka saiñ dewiong bad ia ki pipe kiba pynïasoh bad ki Atoskhana jong kine ki karkhana beaiñ ban pynthikna ba kin ym lah shuh ban dang treikam.
Shuh shuh u la pyntip, katba ki bor synshar District ki dang ap ïa ka kaiphod na ka Committee ba la thung da ka Sorkar, kaba kheiñ ba diah halor ka jingdon jong u dewiong ha kine ki karkhana (Audit Committee on Source of Coal), ki bor synshar District ki la khang tala haduh saw tylli ki karkhana kiba don ïa ki kot ki sla kiba biang (Valid CTE, CTO) bad kine ki kynthup ïa ka M/s Shemphang Riangshiang, Pyndeng Jalong, Doranggri, Shallang, M/s Rilyngngam cok Industries, Kyllon Mathei, Shallang, M/s M.D. Coke Industries bad M/s Carbochem India kiba don ha ka shnong Nongdakong, Shallang.
Hadien ba ïoh jingmynjur na ka Sorkar Jylla hapoh ka jingïalam bad jingkhmih jong u Bah H.K. Thabah, MCS, Additional Deputy Commissioner, I/c Mawshynrut Civil Sub-Division, la thaw ïa ka kawei ka kynhun kaba kynthup ïa ki Gazetted Police Officer, Meghalaya State Pollution Control Board, District Commerce bad Industries na ka bynta ban pynpra bad pynbthei noh ïa ki Atoskhana jong ki 57 tylli ki karkhana saiñ dewiong beaiñ kiba la shna khlem ka Consent to Established (CTE).
La pynjari ruh da ka Section 144 CrPC kaba la pynmih ha ka 11 tarik Natiung, 2023 ban khang pyrshah ïa ka ïaid ka ieng jong ki paidbah ne kino kino ki kynhun hapoh ka jingjngai kaba 1 kilometer na ka jaka ba don ki karkhana saiñ dewiong beaiñ. La kyntu ruh ïa ki paidbah ba kin ïatreilang bad ki bor synshar District katba kane ka kam ka dang ïaid.
