Shillong, ïaïong, 10: Ka kynhun ïalehkai na ka jylla Meghalaya ka la pawbha ha ka lympung ïalehkai Online National Kettlebell Sport Championship, kaba la kut noh dang shen ha Goa, da kaba ïoh khur 13 tylli ki takma ba kynthup 9 tylli ki takma ksiar, 3 tylli ki takma rupa bad kawei ka takma ksiar.
Kane ka kynhun ïalehkai ka la jop ïa ka kyrdan kaba ar, katba ka jylla Maharashtra ka la jop ïa ka kyrdan banyngkong bad ka Uttarakhand ka la wan ha ka kyrdan kaba lai.
Ha jingïakob One Arm 10-Minute Clean and Jerk Category, ki nongïalehkai na ka jylla Meghalaya ki la ïoh khur lut ïa ka takma ksiar. Kine ki kynthup ïa u Brian Wallang, Manish Sohbar, Stevenson Naduh, Ian Kupar, bad Enifer Nongkynrih, katba ka Cathy Marbaniang ka la jop ïa ka takma rupa, ka Kathy Decruse ka la jop ïa ka takma rnong, ka Persara Thangkhiew bad ka Kynjaimon Pdah ki la ïoh khur mar ar tylli ki takma rupa.
Ha kawei ka pat ka jingïakhun, ka Sonia Langstieh ka la ïoh khur ïa ka takma ksiar ha ka 12-Minute Military Snatch katba u Gagandeep Singh u la ïoh khur ïa ka takma ksiar ha ka 10-Minute Snatch Category.
Nalor kine, u Coach jong ka kynhun ïalehkai na kane ka jylla u Sandeep Sharma u la jop ar tylli ki takma ksiar ha ka 10-Minute 24kg Snatch bad ha ka 30-Minute 24kg Snatch. Da kane ka jingjop, u la shah jied ban leit ïakhun sa ha ka Kettlebell World Championship, ka ban sa long ha Busto Arsizio, Italy naduh ka 5 tarik haduh ka 8 tarik, Jylliew, 2025.
Kum ban shu pyntip hangne ba u Sandeep Sharma u la jop teng ïa ka takma rnong na ka bynta ka ri India ha ka Kettlebell World Championships kaba la long ha ka ri Hungary ha u snem 2023 bad ha ka ri Poland ha u snem 2024.
