Shillong, Nailur 14: Ka sorkar jylla ka la mang pisa ban shna ïa ka surok Two-Lane kaba pynïasoh na Nongkohlew sha New Shillong bad kane kan dei ka projek kaba kongsan bha kaba thmu ban kyntiew ka jingpynïasoh lyngba ka surok ha kane ka thaiñ.
U Symbud Myntri Rangbah ka jylla u Bah Prestone Tynsong u la pynbna ba kane ka projek surok kaba jrong 11.100 kilometer ka jinglut kan kot T. 135.5111 klur.
Sa ar tylli ki project ba heh ki dang don ha lynti ban pynïasoh ïa ka nongbah Shillong shaduh ka Umroi Airport.
Ka projek ka NESIDS, kaba long 14.279 kilometer, ka la dep kumba 71%, katba ka projek CRIF, kaba 14-20 kilometer, ka la ïaid 76% ki jingtrei jong ka.
Kine ki project ki long kiba kongsan na ka bynta ban pynheh ïa ka jingpynïasoh ïa ka surok hapdeng ka Shillong bad airport.
Kiwei pat ki projek surok ïa mynta ki dang don ha lynti ne ha ki kyrdan pyrkhat bapher bapher. Kine ki kynthup ïa ka surok Lummawsing sha Mawsiatkhnam kaba la dep 75%, ka surok Mawlai Motsyiar sha Mawlai Umjaiur kaba la dep 90%, ka surok na Mawlai Nongkwar (Block 6) sha Patarim (Block II) kaba la dep 95%, ka surok na Mawlai Nongpdeng Block-A sha Block-B la dep ai ïa ka work order, ka surok na Mawlai Nongkwar (Block II sha Block 3B) la ai ïa ka work order, ka surok na Office ka Dorbar Shnong Mawsiatkhnam sha PHC Mawsiatkhnam ka jingmang ka dang don ha ka jingpynkhreh bad ka surok na Mawlai Stand Bus sha Kynton Massar ka jingkhot ïa ka tender ka dang ïaid.
Ka jingmang na ka bynta ka surok Lummawnei sha Nongpathaw ka dang pynkhreh. Ka jingai ïa ka work order ba khatduh la ai dangshen na ka bynta ban shna ïa ka surok ka ISBT Mawiong sha Lumpyllon, hynrei khlem pat sdang ïa ka kam.
Kumba ka long mynta kam don ka jingtyrwa na ka bynta ban shna ïa ka surok na Mawtawar sha New Shillong lyngba ka shnong Mawpat.
