Shillong, Lber, 17: U MDC barim jong ka Laitkumkrah-Malki District Council Constituency Bah Fantin Joseph Lakadong ha ka Lah Sngi u Blei u la plie paidbah ïa ki lai tylli ki kamra klas bad kawei ka kamra shong jah thait jong ki nonghikai ka Don Bosco Secondary School, Mawkasiang, ïa kaba u la pynïoh na ka Chief Minister’s Special Development Fund 2024 kaba kot T. 14. 18 lak mynba u dang long u MDC.
Ïa kine ki kamra klas ba thymmai la kyrkhu kyrdoh da u Rev. Fr. John Paul Lyngdoh, ha ryngkat ka jingdonlang jong ka Head Teacher jong ka skul ka Kong Eleonora Warbah, u Bah John Jesin Warbah, ki dkhot ka School Managing Committee, u Rangbah Shnong ka Mawkasiang Bah Tishal Kharkongor lem bad ki khynnah skul.
Da ka jingshna ïa kane ka Extension Building, ka la long ka jingkyrkhu bad ka jingmyntoi kaba khraw ïa ki khynnah bad ïa ki nonghikai jong kane ka skul.
