Shillong, Naiwieng 01: Ka Iingbishar Special Judge (POCSO), East Khasi Hills, Shillong jong ka Swapna G. Momin ha ka 27 tarik Risaw 2023 ka la rai pynrem da kaba set along 14 snem kynthih ia u Mortonjune Kharbani bad ia u Lumding Syiemlieh bad dain kuna ruh mar 50 hajar marwei halor ka jingdonkti ban leh be-ijot ia kawei ka heprit kaba dang 12 snem, kaba dang pule ia ka Class-VII ha u snem 2018.
Ha u kyrwoh ba la phah da u Superintendent of Police jong ka East Khasi Hills, Shillong Bah Sylvester Nongtnger, u la pyntip, ba ha ka 3 tarik Nohprah 2018, ki Pulit ki la ioh pdiang ia ka ejahar ba mudui ha Mawngap Police Station halor ka jingshah leh be-ijot jong kawei ka heprit kaba dang 12 snem ka rta kaba dang pule ia ka Class VII ha uwei u briew uba la tip kyrteng kum u Mortonjune Kharbani (45-50 snem ka rta).
Katkum ka ejahar la pynpaw ba une u runar u la leh be-ijot ia kane ka heprit la bun bun sien naduh u snem 2017 ha ka ing sah jong ka ha ka por ba ka don marwei.
Mar mar ki Pulit ki la register case ha Mawngap Police Station hapoh ka kyndon 506 IPC pule lang bad ka sec 5(l)(m)(n)/6 POCSO Act bad ia ka jingtohkit la pynkhamti ha ka Women Police Sub Inspector ka Kong Larisha Kharjana.
Ha ka jingtohkit, la lap ba ka heprit lanot ka la shah leh khelmakor ruh ha uwei pat u briew uba la tip kyrteng kum u Lumding Syiemlieh. Ynda la pyndep ia ka jingtohkti la pynngat kyndon ia kine ki arngut ki runar.
