Shillong, Rymphang, 26: Ka Kashari jong ka Special Judge (POCSO) East Khasi Hills ka S.G. Momin, ha ka 18 tarik mynta u bnai ka la rai pynrem da kaba pynshitom hapoh ka Section 6 POCSO Act da kaba hukum ban set along 14 snem kynthih ïa u Shaiphir Khasaiñ Shabong hadien ba la lap ba u donkti ha ka kam leh be-ijot.
U Superintendent of Police jong ka East Khasi Hills Bah Vivek Syiem ha u kyrwoh u la pyntip ba la register case ïa ka jingjia ha Mawngap Police Station ha u snem 2017 hapoh ka Section 6 POCSO Act pule lang bad ka Sec 376 (2) (i) (n)/506 IPC (Special POSCO Case No. 61 of 2017).
Na ka jingleh kam bymman hapoh ka Section 6 POSCO Act, ka Kashari ka la hukum ïa u nongshah rai pynrem ban shong along 14 snem bad ban siew ïa ka kuna kaba T. 15, 00 hajar bad lada um lah ban siew un hap ban shong along biang sa lai bnai.
Na ka jingleh kam bymman hapoh ka Section 376 (2) (i) IPC u Shaiphir un hap shong along 14 snem ryngkat bad un hap siew ïa ka kuna kaba T. 15,000 hajar bad um lah ban siew un hap ban shong along sa lai bnai.
Namar ka jingleh kam bymman hapoh ka Section 506 IPC, u Shaiphir un hap ban shong along 2 snem bad un hap siew ïa ka kuna kaba T. 5,000 hajar bad lada um lah ban siew un hap ban shong along sa shi bnai kynthih.
U SP u la pyntip ba ïa ka jingtohkit la bynshet ha ka WPSI L. Kharjana jong ka District Executive Force kaba trei mynta hapoh ka Lumdiengjri Police Station, Shillong.
