Shillong, K’lyngkot, 05: Ki samla Khasi kiba trei kum ki nongap pahara ha ka National Institute of Technology (NIT) Meghalaya kaba don ha ka shnong Sohra ki la pynpaw ïa ka jingsngewkhia haba ka North Eastern Security Services (NESS) kaba la shimti ïa ka kam pahara ka la bthah ïa ki nongtrei ba ki dei ban siew ïa ka bai registration T. 15 hajar na ka bynta kiba trei kum ki Security bad T. 20 hajar na ka bynta kiba bat ïa ka post Assistant Security Officer (ASO) bad Supervisor.
Ki nongtrei kiba ap pahara ha kane ka shlem pule kaba don ha Sohra ki la kynnoh beit beit ba ka North Eastern Security Services (NESS) kaba dang shu shimti ïa ka kam pahara ha ka 1 tarik, Kyllalyngkot, 2026 ka la pyntreikam ïa kane ka kyndon treikam namarba ka thmu beit ban wanrah da ki briew lajong kiba nabar jong ka jylla.
Uwei na ki nongtrei Security ha ka jingïakren bad u nonglum khubor ka Batesi TV u la ong, “katkum ka jingïakren pynbeit bad ki bor pynïaid ka NESS bad u Director jong ka NIT, Meghalaya la rai ban pynneh beit ïa kijuh ki nongtrei pahara kiba dei ki trai jylla. Hynrei kaba lyngngoh ka long ba ki bor pynïaid ka NESS ka ong ba ïa ka post Assistant Security Officer (ASO) bad Supervisor dei ban thep da ki briew kiba la shongthait na ka kam shipai katba kiba trei mynta ha kine ki ar tylli ki post ki dei lypa ki shipai ba la shongthait.”
U Nongaiktien jong ka Hynniewtrep National Youth Front, South East, Sohra Circle u Bah Banjop Khongwir ha ka jingïakren bad u nonglum khubor ka Batesi TV u la ong ba ka seng kan ap tad haduh ban da ïakynduh ïa u trai jong ka North Eastern Security Services ha ka 6tarik, Kyllalyngkot, 2026 khnang ban ïoh jingpynshai shwa ba ka seng kan shim da kiwei pat ki sienjam ban ïaid shakhmat.
