Shillong, Jylliew, 06: Ka jingbym phaikhmat jong ka Sorkar Meghalaya Democratic Alliance ba la lamkhmat da ka National Peoples Party ban shna noh ia ka surok Nongpoh, Umden, Sonapur kaba la jot bad kaba la pynsuhsat haduh katta katta ia ka leit ka wan haba pang ba shitom bad ka rah ka rong jong ki paidbah nongshong shnong ka them Ribhoi, ka Kong Bindas Syiem marwei ka la tur ban leit shong shah thngan hakhmat ka ophis Main Secretariat ha ka sngi Palei.
Ha ka jingiakren bad ki lad pathai khubor ka Kong Bindas Syiem ka la iathuh ba ka jingshim ia kane ka rai ban shong shah thngan hakhmat ka Main Secretariat ka dei namarba ka sorkar ka la leh meinah bad leh matlah mynta la 15 snem kynthih ban shna ia ka surok Nongpoh, Umden, Sonapur kaba la jot haduh katta katta.
Ka Kong Bindas Syiem ka la iathuh ba kan bteng beit ban shah thngan hakhmat ka Secretariat manla ka sngi tad haduh ba ka Sorkar kan da shna pynbna ia kane ka surok.
Haba iathuh ia ka daw kaba pynlong ia ka ban mih shakhmat ka Kong Bindas ka la ong, “ialade ruh nga la mad, haba ngi pang ngi shitom ha iing ha sem, ngi la mad ia ka jingeh namar ka jingsniew palat ka surok, wat ki marjan marpa ruh ki la mad jingeh. Ka don ka paralok jong nga, kaba sah marjan bad ka shnong jong ngi, i don i khun ksiew iba pang jur bha bad ha ka por ba la pynkynriah na Umden PHC sha Nongpoh Civil Hospital, namar ka jingsniew palat jong ka surok u pipe jong u tyndong lyer (Oxygen) u la dkut .”
Shwa ban shong shah thngan, ka Kong Bindas ka la iathuh ba ka la pan jingbit na ka ophis jong u Deputy Commisioner ka East Khasi Hills District hynrei na ka liang jong u DC ula phah pynban da ka jingpynshai ba pyntip ba ka Sorkar ka la mang ia ka skhim na ka bynta ban shna ia ka surok Nongpoh-Umden-Sonapur.
“Haba nga pan jingbit ban shong shah thngan, ka ophis u DC ka phah pynban da ka jingpynshai ba ka Sorkar ka la mang ia ka skhim ban shna ia ka surok. Ngam kwah ia ka jingpynshai hynrei nga kwah ia ka jingai jingbit,” la iathuh ka Kong Bindas.
