Shillong, Jymmang, 27: U Myntri Rangbah ka Jylla Conrad K Sangma ha ka Sngi Baar u la plie paidbah ïa ka Architectural Drawing jong ka Tura Secretariat ïa kaba yn tei ha ka jinglut kaba kot T. 150 klur.
Haba kren ha ka jingïalang kaba la long ha Samanda bad Williamnagar, u Myntri Rangbah u la pyntip ba kane ka Secretariat kan treikam kum ka “Additional Secretariat” khnang ban pynsuk ïa ki jingdonkam ka bynta ki paidbah jong ka rilum Garo
Katkum ka jingïathuh jong u Myntri Rangbah watla kane ka Secretariat kan treikam kum ka Mini Secretariat hynrei ka Sorkar kan buh lut ïa baroh ki tnat treikam, kynthup ruh ïa ka ophis treikam jong u Myntri Rangbah, ki Myntri Sorkar bad ki Ophisar.
Shuh shuh u la pyntip ba ïa ka phase-1 jong kane ka Secretariat yn pyndep noh la kumno kumno ha u bnai Kyllalyngkot, 2027 khnang ban pynsuk ïa ki paidbah Garo ki bym donkam shuh ban dang wan sha nongbah Shillong na ka bynta ki kam ophis.
“Ki paidbah na rilum Garo ki hap ban leit shaduh Shillong na ka bynta ki kam ophis bapher bapher. Ka jingthmu jong ka Tura Secretariat kan pynthikna ban pynsuk shikatdei ei ïa ki paidbah ka rilum Garo ha ki kam ophis ki ban treikam beit ha Tura,” la bynrap u Myntri Rangbah.
Ka jinglut banyngkong ban tei ïa ka Mini Secretariat ha Tura ka long T.30 Cr, ïa kaba mynta la mang ban pynlut T. 150 klur tam.
U la ïathuh ruh ba ka Tura Convention Centre kan don marjan bad ka Tura Secretariat, kumba la pyni ha ka Aarchitectural 3D Drawing.
