Shillong, Lber, 05: Palat 750 tylli ki Digital Library yn sa tei ha ka jinglut kaba kot T. 162 klur ha kylleng ka jylla ban kyntiew ïa ka jingpule lyngba ki kor ki bor Digital ban bad pyntyllun shakhmat ïa ka pule ka puthi, la pyntip u Myntri Rangbah Conrad K Sangma haba wanrah ïa ka mang tyngka ha ka sngi Balng ha Ingdorbar Thawaiñ ka Jylla.
U la pyntip, kumba T. 150 klur yn sa bei pisa ban pynbha ïa ki ing skul. Ka jingshna pynbha bad ka jingshna ïa ki ing skul ba thymmai ha ki 37 tylli ki Senior Secondary School bad ka jingshna ïa ki 4 tylli ki DIET Hostel yn sa leh noh mardor.
U Sangma u la ong ba ka jingïaid shakhmat ban ithuh ïa ki skul ki bym don khynnah skul bad kiba don tang khyndiat la shimkhia bha. Ki don 2,475 tylli ki skul na ki 14,582 tylli ki skul ki bym don khynnah skul bad kiba don tang khyndiat ngut.
“Ngi la thaw ïa ki lad ki lynti kumno ban pynbeit ïa ka jingtreikam jong ki skul kiba la ïoh jingkyrshan na ka Sorkar,” u la ong.
Hapoh ka Mission Education u Sangma u la ong, “ngi la kut jingmut ba T. 326 klur bad ngin sa leh khyndiat pa khyndiat ban kyntiew kyrdan, ban shna pynbha bad ban tei thymmai biang ïa ki 2044 tylli ki skul sorkar. Baroh ki jingtrei ha ka wat kaba lai yn sa pyndep noh shen bad ïa ka wat kaba saw jong ka Mission Education yn sa pynbna ha u snem 2025-26. Ka jingphaikhmat sha kane ka bynta ka long ban pynïoh shispah na ka shispah ïa ki jingdonkam ha ki skul sorkar.”
Shuh shuh u Myntri Rangbah u la ong ba la pynkhlaiñ ruh ïa ki jingpule kiba kham shalor da kaba wanrah ïa ki ar tylli ki Professional College, ar tylli ki Model Degree College bad lai tylli ki Polytechnic.
U la ïathuh shuh shuh ba la kyntiew kyrdan 29 tylli ki kolej sorkar bad ki kolej ba la ïoh jingkyrshan na ka Sorkar hapoh ka Phase I bad Phase II jong ka RUSA bad la pynkylla ïa ki lai tylli ki kolej ba la ïoh jingkyrshan na ka Sorkar sha ki Model Degree College.
“Kine ki jingbei pisa ki la ïarap haduh 20% ka jingpynrung ïa ki samla pule ha ka Higher and Technical Education ha ka jylla,” la ïathuh u Sangma.
