Shillong, Naitung, 08: Ka jingbym lah jong ka Sorkar Jylla ban pyntreikam ia ka Work Permit bad ia ka Meghalaya Residents Safety and Security Act (MRSSA) bad ka jingsahteng ban ioh ia ka Inner Line Permit (ILP) ki shnat treikam jong ka Khasi Students Union (KSU) ha ka Lah Sngi u Blei la pynlong ia ka jingkhynra naphang ia ki nongbylla bar jylla kiba wan trei beaiñ hapoh ka Bri Hynñiewtrep khlem ka Work Permit kaba dei ka Aiñ Sorkar Jylla.
Ha u kyrwoh ba la phah da u Information & Publicity Secretary jong ka KSU u samla Pynshai Rani ula iathuh ba mynta ka kynti, ka KSU Mawlai Circle ha ka jingkhynra, ka la lap haduh 177 ngut ki bar jylla kiba trei beaiñ hapoh u pud u sam jong ka shnong Mawlai.
Ia kane ka jingkhynra Work Permit ba la ialam da u General Secretary u samla Eddie Robin Malngiang la lap ba baroh ki bar jylla kim shym la don ia ka Work Permit bad kaba kham sngewlyngngoh ka long ba kim shym la don wat tang ka EPIC ruh ban pynshisha ba ki dei ki nong India.
Ha kane kajuh ka sngi, ka KSU Mawprem Circle ba la lamkhmat da u President u samla Aristone Thabah ka la khynra ia ki jaka trei bylla ha kiba bun ki bynta jong ka thaiñ Mawprem baroh kawei.
Ha ka jingkhynra, ka seng ka la lap ba ki don haduh 100 tam ki mynder na ka ri Nepal bad ki bar jylla na ka jylla Assam, Uttar Pradesh bad Bihar ki bym don ia ka Work Permit bad ki jingpynshisha.
Kine ki ar tylli ki tnat treikam jong ka KSU ki la phah song noh ia ki tum ki tam bad phah mih noh na shnong Mawlai bad na ka shnong Mawprem da kaba phah leit phai sha la ka jong ka shnong.
