Shillong, Ïaiong 10 : Ka Wards Lake kaba ju tip paidbah kum ka Nan Polok kaba long ka jaka jngohkai kaba khring bha ïa ki nongshang kai kaba don ha dohnud jong ka Sor Shillong shen kan sa kylla dur hadien ba ka Sorkar Jylla ka la thmu ban pynlut pisa klur tyngka na ka bynta ban pynbhabriew shuh shuh ïa kane ka jaka shongkai pyngad.
Ha ka jingïakren bad ki lad pathai khubor, Myntri ka Sorkar Jylla uba khmih ia ka tnad Jngohkai Pyrthei Bah Paul Lyngdoh u la ïathuh ba mynta ka kam ka la ïaid shakhmat ban aiti biang ïa ka Wards Lake na ka tnad Forest and Environment sha ka tnat Tourism.
“Ka Wards Lake kumba phi tip, wat ka jingkieng, ka long kaba kham phylla bad long ka shap jong ka Meghalaya, ka la don bad ka Tourism Department hynrei na ka daw ki katto katne ki daw, la peit noh da ka Forest Department,” ong u Myntri haba kren bad ki lad pathai khubor.
Shuh shuh u la ïathuh ba ha ka jingïalang kaba la pynïaid da u Myntri Rangbah ki la shim ïa ka rai ba yn peit biang noh da ka tnad Tourism ïa katei ka jaka jngohkai.
“Katba ngi dang kren mynta, ngi la dep ruh ban mang haduh 18 klur tyngka na ka bynta ban pynkylla dur bad pynitynnad shuh shuh ïa kane ka jaka jngohkai da kaba kynthup naduh ki cafe, ki jingpynbyrngia bad kiwei kiwei,” u la ong.
Nangta u ola ong ruh ba ka por ban khang ïa kane ka jaka jngohkai la pynjlan na ka 5baje janmiet sha ka 10baje mynmiet.
U Myntri u la ong ruh ba hadien ba ki la shimti pura ïa katei ka jaka, kin pyntikna ba ka por plie por khang kan kylla. U ong ruh ba kane kan plie lad ruh kham kylluid ka por ïa ki nongwan kai nalor ka jingpynbiang ia ki jingpynbyrngia kiba ki nongwan ki ju khmih lynti ba kin don ha ka por janmiet.
“Kane kan ïarap ruh ïa ki nongtrei sorkar jongngi namar kumba phi tip ka por khang ophis kadei 5baje janmiet bad ka Lake ruh ka khang 5baje, kumta kine kin ïohlad ban leit ïaid kai pyngad sawdong bad ruh ban kilan met ïalade,” u la ong.
Halor ka jingkylli, u Bah Paul u la ong ruh ba ka bynta kaba kham kongsan ba kin leh hi kadei ka jingpynbiang ïa ki jingpynbyrngia ka ban khring ïa ki paidbah.
“Ngin sa don ki prokram, kum kiwei ki nongbah ba la kham kiew ki la ïaid shakhmat.”
