Shillong, Naitung, 15: Ki nongïalam jong ka Khasi Students Union Nongmensong Unit ki la ïakynduh ïa u Myntri ka tnat Bording ka Sorkar Jylla u Abu Taher Mondal, ban phah tuklar halor ka jingkiew shaba palat ka bai thang bording ha ïingsah jong ki longïing baduk ha BSUP Housing Complex kaba don ha Nongmensong.
Ki longïing ki la ujor halor ka jingkiew ka bai thang bording naduh ba la pyndait ïa ki pre-paid Smart Meter.
Ha ka jingïakren ha ki lad pathai khubor, u President ka KSU-Nongmensong Unit u samla J. Pohthmi u la ong ba ki longïing kiba sah ha BSUP Housing Complex ki dei kiba duk bad kiba hap hapoh u laiñ ka jingduk, mynshwa ki siew ïa ka bai thang bording T. 500-600 shi bnai. Hynrei naduh ba la pyndait ïa ki Smart Meter, ka bill ka la la kiew kynsan sha ka T. 2000 shibnai, kaba pynlong ïa kiba bun ki longïing ban ym lah ban siew shuh.
Halor kane, u la ong ba ka seng ka la kyntu ïa u Myntri ka tnat Bording ban tuklar bad ban weng ïa kane ka jingeh haba kyrpad ban pynneh ïa ka rukom siew kaba rim, haba pyrkhat ïa ka jingeh ha ka liang ka kamai kajih jong ki briew kiba sah hapoh ka Complex.
“Ngi kyrpad ruh ïa phi, halor ka jingsngew parabriew ba phin sngewbha ban pynneh ïa ka dor siew kaba rim kaba long tang T.500-600 shi bnai da kaba shim khia ba baroh ki longïing ha katei ka jaka sah ki long ki baduk ha ka ïoh ka kot namarba ki kamai mynstep ki thied khaw da miet. Ngi don ka jingshaniah ba hapoh ka jingïalam batbit jong phi ïa kane ka kam yn sa lah ban pynbeit da ka khnang ba kan ai jingmyntoi ïa ki longïing kiba sah ha BSUP Housing Complex jong ka Nongmensong,” ong u samla Pothmi.
Haba kylli, u President u la ïathuh ba ka jingïalang ka la long kaba seisoh namarba u Myntri u la kular ba un sa khmih bniah halor kane ka kam.
“U (Myntri) la kular ba un sa ïakren ïa kane ka kam ha ka jingïalang pyrkhat kam ban sa pynïaid hi ma u lashai ka sngi,” la bynrap u samla Pohthmi.
