Shillong, Naitung 10: Hadien ba ladep ban pynlong ïa ka 6th Meghalaya Games 2025 ha u bnai Kyllalyngkot 2025 ha sor Jowai, ka Hynñiewtrep Integrated Territorial Organisation (HITO) ka la wad jingtip lyngba ka Right to Information Act, 2005 khamtam eh ha kaba ïadei bad ka jingpynbiang ïa ka um sha ki nongïalehkai.
Ha ka Meghalaya Games 2025 kaba la neh haduh hynriew sngi lynter la ïashim bynta kumba lai hajar tam ki nongïalehkai na kylleng ki district ka Meghalaya ha ki jingïalehkai bapher bapher naduh ki Indoor haduh ki Outdoor Game bad ïa ki lai hajar tam ngut ki nongïashim bynta la pynsah ïa ki ha Kiang Government College, Jowai Polytechnic Campus, Government Girls’ Secondary School, Wahiajer Multipurpose Sports complex bad sha kiwei kiwei ki bynta jong ka sor Jowai.
Ha kaba ïadei bad kane na ka liang ka seng ka la pyrshang ban buddien halor ka jingpynbiang ïa ka um sha ki jaka sah jong ki nongïashim bynta da kaba pan ïa ka RTI na ka ophis jong u Executive Engineer PHE Electrical Division Jowai ha ka 21 Ïaiong, 2025 bad ka seng ka la ïoh pdiang ïa ka jubab ha ka 20 tarik, Jymmang, 2025 bad lyngba ka RTI la pynpaw ba la pynlut T. 2, 71, 46, 370 klur ban ban pynbiang ïa ka um ha ki jaka sah.
“Halor ka jubab RTI, ka HITO ka la kam ba ka la lap shibun ki jingkylli ba ka ophis u Executive Engineer PHE Electrical Division Jowai um shym la lah lah ban jubab. Haba kylli hato ki Contractor ki la submit ne em ïa ki Utilisation Certificate, ka jubab ka long ym don bad kane ka la pynlyngoh ïa ka seng ba ka don eiei shalyndet bad ka jingbamsap ba shyrkhei ha kane ka kam ba kumno kat ka project kaba kot da ki klur ym don Utilisation Certificate,” ong u kyrwoh ba la phah da u General Secretary ka HITO Seng Kmie u Bah Wanbun N. Dkhar.
“Haba pan ïa ki Cash Memo bad ki voucher ban pyni ïa ki jingthied ïa ki tiar ba la pyndonkam ha kaba ïadei bad ka jingpynbiang um, ka jubab ka long ym don bad ruh haba pan ïa ka kopi jong ka Completion Report ne ka syrnot ban pyni ba ka jingtrei ba ladep ruh ka jubab ka long kumjuh ym don,” la kynnoh shuh shuh ka Seng.
“Kaba pyntharai sniaw shuh shuh ïa ka seng ka long ba ka Ophis u Executive Engineer PHE Electrical Division Jowai ka la ai tang da ka Formal Work Order sha ki Contractor, kam da dei eh kata ka Work Order kaba paka bad ïa kitei ki jingtrei baroh la ai por ruh tang hapoh 11 sngi ban pyndep,” la pyntip u nongïalam ka HITO.
Halor kane ka HITO ka la ong ba kan sa nang buddien bad ai jingthoh sha ki bor bahalor bad lada ka Seng kam ïoh ï aka jingshai kaba lah ban pynhun ne jingshai kaba shisha, kan sa leit tied ïa ka jingkhang jong ka ïingbishar ne ka Lokayukta.
