Shillong, ïaïong, 03: Ka Kashari jong u M. Kumar, Special Judge (POCSO), West Khasi Hills, ka la rai pynrem ïa u nongleh kam bymman uba la tip kyrteng kum u Ayam Sunil Khuman, 58 snem ka rta bad ai jingpynshitom da kaba phah set along 20 snem ryngkat bad ka jingdaiñ kuna kaba T. 1, 25, 000 lak hapoh ka Section 6 jong ka POCSO Act bad sa san snem ka jingset along ba malu mala ryngkat bad ka jingdaiñ kuna kaba T. 25,000 hajar hapoh ka Section 10 jong ka POCSO Act bad lada um lah ban siew ïa kane ka kuna un hap ban bteng ïa ka jingshah set along sa hynriew bnai.
Ha u kyrwoh ba la phah da u Superintendent of Police ka Eastern West Khasi Hills District ula pyntip ba ki Pulit ki la ïoh pdiang ïa ka ejahar ha ka 27 tarik, Naitung, 2020 ha kaba la kynnoh ba u Dr. Ayam Sunil Khuman, 58 snem ka rta uba sah ha kawei ka shnong ha Eastern West Khasi Hills bad uba dei u nongshong shnong jong ka shnong Khurai, Imphal East District, Manipur u don kawei ka Clinic ha kawei ka shnong ha Eastern West Khasi Hills ha kaba u la leh ïa ka kam bymman pyrshah ïa ka nongpang kaba dang hapoh 18 snem ka rta.
Ïa ka Case la rejistar ha Mairang Police Station hapoh ka Section 7/8 jong ka POCSO Act bad ïa ka jingtohkit la bynshet ha ka Sub Inspector R.R Marak jong ka Mairang Police Station. Ha ka jingtohkit la kem noh ïa u nongleh kam bymman bad la set ha Judicial custody.
Ha kawei pat ka jingjia, ka kashari jong u M. Kumar, Special Judge (POCSO), West Khasi Hills ka la rai pynrem ïa u nongleh kam bymman uba la tip kyrteng kum u Buksar Lyngdoh Lyngkhoi, 37 snem ka rta bad ai jingpynshitom da kaba hukum ban set along na ka bynta 20 snem ryngkat bad ka jingdaiñ kuna kaba T. 15,000 hajar bad lada um lah ban siew ïa ka kuna un hap ban bteng ïa ka jingshah set along sa 6 bnai.
U Superintendent of Police jong ka Eastern West Khasi Hills District ha u kyrwoh u la pyntip ba ki Pulit ki la ïoh pdiang ïa ka ejahar ha ka 4 tarik, Kyllalyngkot, 2023 halor ka jingkynnoh ba u Buksar Lyngdoh Lyngkhoi, 37 snem ka rta na kawei ka shnong kaba hap hapoh ka Eastern West Khasi Hills u la jrong kti ïa kawei ka khynnah kaba dang hapoh 18 snem ka rta.
Ha kaba ïadei bad kane ka jingjia, ki Pulit ki la registered case ha Mairang Police Station hapoh ka Section 363 Indian Penal Code bad pule lang ruh bad ka Section 5(k)(l)/6 jong ka POCSO Act bad ïa ka jingtohkit la bynshet ha ka Sub Inspector. B.Nongrang jong ka Mairang Police Station.
Katba dang ïaid ka jingtohkit, ïa u nongleh kam bymman la kem bad la set ha Judicial custody.
Nalor kine ki ar tylli ki jingjia, ka Kashari jong u M. Kumar, Special Judge (POCSO), West Khasi Hills ka la rai pynrem da kaba hukum ban set along lai snem kynthih ïa u Phrangsngi Ryntathiang bad daiñ kuna 10,000 hajar kum ka jingpynshitom halor ka jingdonkti ban jrong kti ïa iwei i khynnah kynthei ba dang hapoh 18 snem ka rta.
Ka Kashari ka la hukum ïa u nongshah rai pynrem ba lada um lah ban siew ïa ka kuna kaba 10 hajar un hap ban bteng ïa ka jingshong along sa 6 bnai.
U SP ka Eastern West Khasi Hills ha u kyrwoh u la pyntip ba ha ka 4 tarik, Naitung, 2023, ki Pulit ki la ïoh pdiang ïa ka ejahar ba la ujor pyrshah ïa u Phrangsngi Ryntathiang, 27 snem ka rta uba sah ha kawei ka shnong kaba hap hapoh ka Eastern West Khasi Hills halor ka jingkynnoh ba u la jrongkti ïa iwei i khynnah kynthei.
Ki Pulit ki la register ïa ka case ha Mairang Police Station hapoh ka Section 506 Para-I Indian Penal Code, pule lang bad ka Section 5 (n)/6 jong ka POCSO Act bad ïa ka jingtohkit la bynshet ha ka Sub Inspector A. Thongni.
Katba ka jingtohkit ka dang ïaid shakhmat ki Pulit ki la kem ïa u nongleh kam bymman bad la set ïa ha Judicial Custody.
