Shillong, Jymmang, 21: Ki dkhot jong ka Hynñiewtrep Youths’ Council, Central Executive Council (HYC-CEC) ha ka sngi Balang ki khynra ïa ki nongbylla bar jylla kiba trei ïa ki projek bapher bapher jong ka Sorkar Jylla kiba don ha New Shillong.
Ha ka jingkhynra ha ki ar tylli ki jaka treikam, ki dkhot ka seng ki la lap ba ka kam ka dang ïaid shaid shaid, la ong u kyrrwoh na ka seng.
Haba kylli pyrthew da ki dkhot ka seng la lap ba ki don kumba 350 haduh 400 tam ki nongbylla bar jylla ha kine ki jaka trei bad na kine kumba 200 tam ei ei ki bym don ïa ki kot ki sla kiba biang bad ïa kine baroh la phah ba kin mih noh na ki jaka bylla bad bthah ruh ba kim dei ban wan trei lada kim don ïa ki kot ki sla kiba biang kum ka Registration Card na ka tnat Labour.
Ka seng ka la pyntip ba ki don ruh ki nongbylla bar jylla kiba wan ïalam lang ïa la ki kurim ban sah lang ha ki jaka trei bad mardor ki dkhot ka seng ka la phah ba kin mih noh.
“Ngim lah khlem da pynpaw ïa ka jingsngew lyngngoh ba kumno kine ki 200 ngut tam ki nongbylla bar jylla ki ïoh ban trei ban ktah hapoh kitei ki projek khlem da pynbiang ïa ki kot ki sla kiba biang. Don napdeng jong ki kiba pyni tang ïa ka ‘Acknowledgement Slip” ba ki lah aplai ïa ka Registration Card na ka tnat Labour bad khlem da ïoh ïa ka Registration Card, ki lah da sdang ban trei bylla,” la ong ka seng.
Da kaba kdew ïa ki aiñ ba la thaw da ka Sorkar ka HYC ka la ong, “kane ka long pyrshah ïa ka aiñ ba ka Sorkar Jylla ka lah shna ïa kaba la tip kum ka Meghalaya Identification, Registration (Safety & Security) of Migrant Workers Act, 2020 bad ka Meghalaya Identification, Registration (Safety & Security) of Migrant Workers Rules, 2020. Katkum ka kyndon 4 jong ka Meghalaya Identification, Registration (Safety & Security) of Migrant Workers Act, 2020 baroh ki nongbylla kiba wan nabar ka jylla (Migrant Workers) ki dei ban regjistar ïalade bad ban da ïoh ïa ka Registration Card haba ki wan trei hapoh ka jylla Meghalaya bad lada ki pynkheiñ ïa kane kin shah daiñ kuna. Kino kino ki briew kiba aikam ïa ki nongbylla bar jylla ki dei ban pynthikna ba kita ki nongbylla bar jylla kin da rejistar ban ïoh ïa ka Registration Card bad lada ki pynkheiñ ïa kane ki lah ban shah daiñ kuna.”
“Ngi pynrem jur ïa ka jingshim sting jong ki tnat treikam ka Sorkar Jylla ki bym shim khia ban pyntreikam ïa ki kyndon ain kiba ka Sorkar hi ka lah shna bad kane ka lah ban buh jingma shi katdei eh ïa ngi kum ka jaidbynriew ritpaid bad kumjuh ruh ka lah ban ktah ïa ka shongsuk shongsaiñ ha ka Jylla hi baroh kawei namar ba kumba paw hi ki dak ki shin ki lah ruh ban don wat ki Bangladeshi ki ban rung bad riehtngen ha kum kine ki jaka trei kiba bun paid bad hadien katto katne kin sa mih pat ban leh ïa ki kam beaiñ kiba bunjait ym tang ha ka Jylla hynrei ha Ri India hi baroh kawei,” la kynthoh ka seng.
“Ngin nang pynjur shuh shuh ïa ki jingkhynra ïa ki nongbylla bar jylla kylleng ka rilum Khasi-Jaintia nangne shakhmat ruh bad lada ngi lap ïa ki bym don ki kot ki sla kiba biang, ka Seng kan ym shah ba kin shong kin sah bad trei ha kum kita ki jaka trei bad ban pynphai ïa ki sha la ki shnong ki thaw kiba ki wan,” la maham ka seng.
