Shillong, Jylliew 26: U Bah Shanborlang Pakynteiñ uba dei u nongshong shnong ka 3rd Mile Umlyngka Upper Shillong u la leit ban ujor sha u CEO ka Shillong Municipal Board halor ka jingkiew ka bai lum khajna na ki kali kiba don hapoh ka Ïew Mawlong.
Ha ka shithi jingujor u Bah Pakynteiñ u la ong ba ha ka 25 tarik mynta u bnai hadien ba u la pynïeng ïa ka kali shimet jong u kaba don u nongbar ML 05 X 4850 ha 3rd Mile Stand Ïewmawlong ha ka por kumba 5 baje janmied haduh ka por 9:48 , bad hadien ba u la pynïeng ïa ka kali u la leit ban sam ïa ki baby diaper sha ki dukan bad u la ong ba kane ka kam kaba u la trei ka dei kaba u la leh mynta la kumba 3 bnai, bad u la ju trei teng kum u nonglum khajna ïa ki kali ha Stand Mawprem.
Ha ka jingujor u la pyntip ruh ba hadien ba u la dep ban die ïa ki baby diaper bad hadien ba u la poi sha ka jaka pynïeng kali la don uwei u khynnah uba la ong ba dei ban siew T. 200/- bad hadien ba u la dep siew ïa katei ka pisa bad pan ïa ka slip/voucher utei u khynnah um shym la ai ha kaba na kane ka la mih ka jingïania bad utei u khynnah uba peit ïa katei ka jaka ïeng kali bad hadien ba la kylli balei ba la lum palat ïa katei ka bai khajna ïeng kali u tei u khynnah u la ong ba ka bai pynïeng kali kadei T.40 shi kynta hynrei ha kiwei pat ki jaka ki la lum tang T.20/- shi kynta na ka bynta ki kali private bad ki saw shaka hynrei ha 3 Mile Stand Ïewmawlong ki shim haduh T.40/- shi kynta kaba dei ka dor kaba heh bha.
Kumta halor kane u tei u Rangbah u la kyrpad ïa ka jingtuklar lem jong u CEO ban shim khia ïa kane ka kam kaba dei ban long ruh kham kloi katba lah. U la ong ruh ba hadien ba la jia kane ka kam shah shim palat pud ka bai ïeng kali u la kynduh ruh ïa ki pulit ha kaba ki la ai jingmut ba dei ban leit ujor sha ki bor badei peit.
