Shillong, Nohprah, 03: Ka Dorbar Shnong Mawkyrwat ryngkat ka jingïatreilang bad ka Seng Samla Shnong Mawkyrwat, ka Village Defence Party (VDP) Mawkyrwat bad ka Seng Longkmie Mawkyrwat ha ka jingleit khynra ha iew Mawkyrwat, ki la ïoh ban kurup palat 500 litar ka kyiad Khasi bad 2,075 bilor tam ka kyiad phareng.
Ha ka sngi Balang ryngkat ka jingsakhi lang Superintendent of Police ka South West Khasi Hills District Bah B. Jyrwa, u Additional Superintendent of Police Bah J.P. Lakiang, u Officer Incharge ka Mawkyrwat Police Station bad ki nongsakhi la theh paidbah ha madan Jakar, Mawkyrwat.
Kiba la sakhi lang ha kane ka sngi ki kynthup ruh ïa ki Myntri bad ki Secretary Shnong jong 12 tylli ki shnong kiba hap hapoh ka thaiñ.
Kum ban shu pyntip ba ka jingleit khynra kyiad ka sdang naduh u bnai Jymmang haduh u Nohprah, 2025, ha kaba ka Dorbar Shnong Mawkyrwat, ka Seng Samla, ka VDP bad ka Seng Longkmie ki la shimkhia ban pyrshah ïa ka jingdie beaiñ ïa ka kyiad hapoh ka ïew Mawkyrwat.
Ha kane ka sngi, ka Dorbar Shnong Mawkyrwat ka la pynkup burom kyrpang ïa u Traffic Officer jong ka Mawkyrwat Police Station u Bah R. Rymbai.
