Shillong, Jymmang, 19: Khlem da duh jingkyrmen na ka jingther jong u lapbah uba jur ha ka por shiteng sngi ka Lah Sngi u Blei u Myntri Rangbah ka Jylla Meghalaya Conrad K. Sangma u la leit ban jngoh ïa ka iew Ïewduh kaba long kawei na ki iew tynrai kaba la rim bad ka kad khaii kaba heh tam ha ka jylla.
Ka jinghap jong u slap uba jur kam shym la lah ban ban pynjem ïa ka mynsiem jong u Myntri Rangbah katba u dang ïaid na ki lynti ba la shlei um ha ïewduh bad u da ïakynduh ruh markhmat bad ki nongdie bad leit jurip hi dalade ïa ki jinglong jingman jong ki Basa kaba la neh haduh ar kynta.
Ka Ïewduh, kaba long ka kad khaïi kaba don hapdeng ka nongbah Shillong, ka dei ka pliangja jong ki spah ngut ki nongdie bad ki nongkhaïi kiba die ïa ki jhur, ka doh, ka dohkha, ki marbam, ki jingbam ba bang, ki tiar ïing, ki jain, bad ki tiar shna kti jong ki trai ri trai muluk. Kum kawei na ki lad kamai ba kongsan jong ka ri Khasi, ka iewduh ym tangba ka shakri ïa ki nongshong shnong ka jylla Meghalaya hynrei ka khring ruh ïa ki nongkhaii bad ki nongthied nongpet na kylleng ka jylla bad shabar.
Watla ka ïew ka la dap um ha ka por ba u leit jngoh, u Myntri Rangbah ka Jylla u la ïaid lyngba da kaba ïakren bad ki nongdie dukan bad ki nongdie jingdie ha shilynter ka iew ban sngewthuh ïa ki jingeh kiba u lap.
Ka jingleit jngoh, u la batai hadien kum, “ka sngi kaba pynhun tam” bad “ka sngi kaba kmen tam ha ka jingim jong u,” ha kaba u la ïoh jingpynshai halor ki jingdonkam kyrkieh ban pynbha ïa ki nala um, ki lynti ïaid kjat bad ki jingtei kiba kongsan na ka bynta ka jingdonkam jong ki nongdie bad ki nongthied.
Ki lynti khim ki la kylla long ki nala um namar ka jingbym biang ki nala pyntuid um. Hynrei kane ka jingleit jngoh ka la ai ïa nga ïa ka dur kaba kham shai shaphang ki jingeh kiba ki briew jong ngi ki ïakynduh manla ka sngi, khamtam ha ka por lyiur,” ong u Myntri Rangbah ka Jylla.
Ka sorkar ka la dep ai jingmynjur T.6 klur na ka bynta ka jingshna pynbha kaba dang ïaid shakhmat, kaba kynthup ïa ka jingpynbha ïa ki lynti ïaid kjat bad ki jingtei ba kongsan. Yn sa mang pisa shuh T. 15 Klur ban pynkylla dur ïa ka iew, kynthup ïa ka jingpynbha ïa ki lynti ïaid kjat, ka jingkhuid jingsuba bad ka jingpynbha ïa ki lad ki lynti na ka bynta ki nongshong dukan, ki nongleit nongwan.
Ka jingthmu jong ngi ka long ban pynthymmai ïa ka iewduh jong ka Shillong. Ka Ïewduh – ka dohnud jong ki nongrep bad ki nongkhaii jong ngi – da kaba pynbiang ïa ki jingdonkam ha ka leit ka wan, ka khaii pateng bad ka jingim ba manla ka sngi na ka bynta ki paidbah,” bynrap biang u myntri rangbah.
Ïa u Myntri Rangbah la synran lang da u Symbud Myntri Rangbah Bah Prestone Tynsong, u Myntri Sorkar Bah Paul Lyngdoh, ka Deputy Commissioner jong ka East Khasi Hills Kong RM Kurbah, ki ophisar sorkar, u Syiem ka Hima Mylliem Pa’iem Ainam M. Syiem bad ki Myntri ka Hima.
