Shillong, Rymphang, 12: U Bah Michael Kharsyntiew uba mihkhmat ïa ka KTIEW EMS TRUST London ha ka sngi Balang u la plie paidbah ïa ka jingshna pynthymmai jong ka Gynaecology Female Ward ha Dr. H. Gordon Robert’s Hospital, Shillong (ba ju tip mynshwa kum ka Khasi Jaiñtia Presbyterian Hospital).
Ha kane ka sngi, la sakhi lang da u Chairman jong ka Hospital Governing Body u Rev. S. S. Majaw ryngkat lang bad u Medical Superintendent u Dr. Nongrum, ki doktor bad ki nurse.
Ka jingshna pynbha ïa ka Gynaecology Female Ward ba la bei jingïarap pisa da ka KTIEW EMS TRUST London ka la kot kumba 21 lak.
Kane ka kamra ka dei kaba la mang kyrpang na ka bynta ki nongpang kynthei ha kaba la sumar da ki tiar katkum ka juk mynta bad ban ïarap ruh ïa ki nongpang kiba wan na ki longing longsem kiba duna ka ïoh ka kot.
Kane ka projek ban shna pynthymmai ïa ka kamra ka la shimpor haduh 6 bnai ban pyndep. Lah ban kdew ruh ba kane ka kamra ka dei kaba la rim tam jong ka Dr. H. Gordon Robert’s Hospital, Shillong kaba la kynjoh mynta sha ka rta kaba103 snem.
