Shillong, Nailur, 13: Ka Meghalaya SSA School Association (MSSASA) Central Body ha ka sngi Thohdieng ka la pynbna ban pynlong ïa ka General Executive Committee ha ka 21 tarik mynta u bnai ha Community Hall, Riatsamthiah Shillong ban ïathir ïatai ha kaba ïadei bad ka jubab kaba la ïoh na ka tnat Pule Puthi jong ka Sorkar Jylla.
Ha ka jingïakren bad ki lad pathai khubor u President ka MSSASA u Bah Aristotle Rymbai u la ïathuh ba ha kane ka sngi yn sa shim ruh ïa ka rai shwa ban phah ïa ka jingthoh sha ka Sorkar.
U Bah Rymbai u la ong ba kane ka jingïalang kan long ban ïathir ïa tai halor ka jubab ba ka Association ka la ïoh na ka tnad Pule Puthi jong ka Sorkar jylla ha kaba ïadei bad ki jingdawa jong ki nonghikai skul SSA kaba kynthup ïa ka jingpynkiew tulop bad ka jingpynskhem kam ïa baroh ki nonghikai SSA ha ka jylla.
Ha kaba ïadei bad kine ki jingdawa ka Association ka la bteng ban buddien halor kine ki ar tylli ki mat. “Ngi la ïoh lad ban ïakynduh ïa u Symbud Myntri Rangbah ka jylla u Bah Prestone Tynsong, ïa ki Ophisar ka tnat Pule Puthi ban ïakren halor kine ki jingdawa,” la ïathuh u Bah Rymbai.
U la ïathuh ba ki nongïalam ka seng ha ka 10 tarik mynta u bnai ki la ïakynduh ïa u Director ka School Education and Literacy u Swapnil Tembe uba dei ruh u State Project Director (SPD) jong ka SEMAM ban ïakren halor ki mat jingdawa
“Halor ki jingdawa, na ka liang jong u Director u la pyntip ba ha kaba ïadei bad ka jingpynkiew ïa ka tulop u Commissioner & Secretary jong ka tnat Pule Puthi u la bthah ban pynsangeh shwa ïa kane ka jingtyrwa ban pynkiew tulop ïa ki nonghikai skul SSA bad ha kaba ïadei ban ka jingdawa ban pynskhem kam noh ïa baroh ki nonghikai SSA u la pyntip ba ka Sorkar ka ladep ban pynkhreh ïa ka Staff Copy na ka bynta ban rah ïa kane ka mat ha ka jingïalang Kynhun Myntri ban ïoh ïa ka jingmynjur,” la bynrap u Bah Rymbai.
U la pyntip ruh ba ka Ministry of Education jong ka Sorkar India ka ladep ban phah ïa ka shithi sha ki Sorkar Jylla halor ka rai jong ka Cabinet Committee on Economic Affairs (CCoEA) ka Sorkar India ha ka 7 tarik Nailar 2021 ban pynbna ïa ka rai halor skhim Samagra Shiksha Abhyan (SSA) ban kan dang bteng haduh u snem 2026.
Hadien kane ka jingpyntip bun na ki Sorkar jylla ki la nang pynskem ïa ki kam jong ki nonghikai ha ki skul SSA ha la ki jylla kum ha jylla Assam, la pyntip u Bah Rymbai.
