Shillong, Ïaiong 30: Ka Sorkar Pdeng ka la mynjur ban bei pisa 22,864 klur tyngka na ka bynta ban tei ïa ka surok 4-lane kaba jrong 166.80 kilometer (high-speed corridor) kaba pynïasoh naduh Mawlyngkhung (Shillong) shaduh Panchgram, Silchar, Assam lyngba ka Hybrid Annuity Mode.
Na ka 166.80 kilometer ka jingjrong ka surok, ka Meghalaya ka la ïoh haduh 144.80 kilometer katba ki 22 kilometer kiba tam ki hap sha ka jylla Assam.
Ka thong jong kane ka surok heh ka long ban pynsuk ïa ka jingïaid ki kali hapdeng ka sor Guwahati haduh Silchar nalor ba ka pynlyngkot ïa ka jingjngai bad ruh ban pynduna ïa ka por ban pynlut ha lynti. Kane kan pynsuk shuh shuh ïa ka jingpynïasoh bad kiwei ki jylla ka thain shatei lam-mihngi jong ka Ri kum ka Tripura, Mizoram, Manipur bad ka Barak Valley jong ka Assam.
Nalor ba ka thong jong ka sorkar pdeng ka long ruh ban pynsuk ha ka leit ka wan, kawei pat ka thong ka long ban kyntiew wat ha ki kam karkhana ha ka jylla khamtam eh haba ïadei bad ki thain kiba lah ban pynmih ïa ka dewbilat bad dewiong kiba ka ïaid lyngba. Nangta kan pynsuk ha ka leit ka wan ïa ki nongjngohkai pyrthei na ka ri ne wat na shabar-ri kiba ïaid lyngba ka kadliengsuin Guwahati, Shillong bad Silchar.
Ym tang katta kane kan kyntiew wat ïa ka kam jngohkai pyrthei ha kylleng kito ki jaka ba don ïa ki jaka jngohkai ba itynnad ha ka thain shatei lam-mihngi jong ka Ri.
Kane ka surok kan ïaid lyngba ki distrik ba kongsan ha ka jylla, kata naduh Ri Bhoi ter ter sha East Khasi Hills, West Jaintia Hills bad East Jaintia Hills ha Meghalaya nangta ha Cachar district ha Assam. Kan ïarap ruh ban weng ïa ka jingkhapngiah ha ka surokbah NH-06.
Nalorkata, kan pynïasoh ruh bad bun ki kadbah kum ka NH -27, NH-106, NH-206, bad NH-37 kaba khmih lynti ba kan pynïasoh da kaba suk ïa ki sor bad ki nongbah ha ka Jylla la ka long ïa ka sor Guwahati, Shillong, Diengpasoh, Ummulong, Phramer, Khliehriat, Umkiang, Ratacherra, Kalain bad Silchar.
Halor kane, na ka liang u Myntri Rangbah ka Jylla Conrad K Sangma u la ong, “Kane ka projek kan ïarap bad pynjan ïa ka sor Guahati, Shillong bad Silchar.”
U Myntri Rangbah u ong ruh ba kane kan ïarap wat ban weng ïa ka jingdheng kali ne ka jingkhapngiah ha ka surok NH-6 ba mynta.
