Shillong, Lber, 10: Ka Sorkar ka la pyllait pisa T. 23.4 klur ïa ka Shillong Governmnet College of Engineering.
“Baroh ka pisa kaba la mang na ka bynta ka projek ka long T. 26 klur ha kaba ka jingbei pisa ka long 90:10 bad ka pisa ba ladep pyllait da ka Sorkar Pdeng na ka bynta ka projek ka long T. 23.4 klur,” la pyntip u Myntri ka tnat Pule Puthi u Rakkam A Sangma haba jubab ïa ka jingkylli hapoh ka Iingdorbar Thawaiñ ha ka Lah Sngi u Blei.
U la pyntip ba ha ka 26 tarik, Nohprah, 2024, ka Shilong Government College of Engineering ka la aplai ban ïoh jingmynjur na ka AICTE khnang ban sdang noh ïa ki ar tylli ki Technical Course, kata, ha ka Civil Engineering bad ha kaElectrical Engineering.
Ka AICTE ka la shong jingïalang bishar kam ar sien ha ka 22 tarik Kyllalyngkot bad ha ka 4 tarik Rymphang, 2025.
Ki stad ki jhad na ka AICTE ki la ai jingmut sha ki bor pynïaid jong ka College ban bud ïa ki katto katne ki kyndon ha kaba ïadei bad ka jaka pule, ula bynrap.
Ka jingshna ïa ka building, kata, ka Academic Block, ka Administrative block bad ka Boys’ & Girls’ hostel ) jong ka Shillong Government College of Engineering, Shillong la pyndep bad la plie da u Myntri Rangbah ha ka16 tarik, Kyllalyngkot, 2023.
La pynbiang ruh ïa ka umbam umdih, ka bording bad kiwei kiwei hapoh ka College.
U Sangma u la ong ba ka Sorkar ka la pan jingmynjur ban shna ïa ka College bad 55 tylli ki post ruh ladep pynkha.
“Ka Sorkar ka la shah ruh ïa u Additinal DIrector Polytechnic bad Shillong Engineering College ban bat ïa ka kam kum u Principal, Shillong Government College of Engineering. Government bad mynjur ruh ban don 13 ngut ki nonghikai ba la don lypa na ka bynta Shillong Polytechnic ban hikai ha ka Engineering College,” u la ong bad bynrap ba ka NEHU ka la pyntip ba ladep ai jingmynjur na ka bynta ka jingpynïasoh ba shipor ïa ka Shillong Government College of Engineering na ka bynta lai snem.
