Shillong, Nailar, 22: Ka Kashari jong ka Kong P. Syngkon, Special Judge (POCSO), West Jaiñtia Hills District ha ka 20 tarik mynta u bnai ka la rai pynrem da kaba hukum ban set phatok 23 snem bad daiñ kuna T.51,000 hajar ïa u Passti Latam, 20 snem ka rta uba sah ha ka shnong Myntriang hadien ba la lap ba u la leh ïa ka kam bymman hapoh ka Section 5 (g)/6 jong ka POCSO bad ka 448 Indian Penal Code (IPC).
U kyrwoh ba la phah da u Superintendent of Police ka West Jaiñtia Hills, Jowai ha ka sngi Thohdieng u la pyntip ba ïa ka ejahar la ujor ha ka 14.04.2021 da ka Kong Isynei Paslein, ka khun jong u Bah Nol Pasleiñ na ka shnong Myntriang, ban pyntip ba ha ka 12.03.2021, u Passti Latam ryngkat bad uwei pat ki la rung jubor hapoh iingsah jong ka katba kam pat don satia ha iing.
La ïathuh ba u Passti Latam u la beh shabar ïa ki khun ba dang rit kiba don hapoh iing bad ka khun kynthei jong ka, kaba dang 16 snem ka la shah leh be-ijot ha u Passti Latam.
Ïa ka case la register ha Jowai P.S. Case No. 43(4)2021 hapoh ka Section 447 IPC pule lang bad ka Section 5(g)/6 POCSO Act bad la pynlong ïa ka jingtohkit bad ka jingpynngat kyndon da ka WPSI N. P. S. Marak.
