Shillong, Naiwieng, 26: Ka Sorkar Jylla ka la mynjur ïa ka wat kaba ar jong ka Meghalaya Logistics and Connectivity Improvement Project (MLCIP) na ka bynta ban shna pynbha ïa ki surok bad kiwei kiwei ha ka jinglut kaba kot $300 million (kumba 2,450 klur tyngka).
Haba kren sha ki lad pathai khubor hadien ba wai ka jingïalang Kynhun Myntri ha ka sngi Balang, u Myntri Rangbah ka jylla u Conrad K Sangma u la ong ba na ka jinglut baroh jong kane ka projek, $240 million kan dei ka ram na ka World Bank, ha kaba 90% yn siew da ka sorkar India bad 10% yn siew pat da ka sorkar Meghalaya.
U la ong ba 20% na ka jinglut jingsep jong ka project, kumba $60 million yn hap ban noh synñiang da ka Sorkar Jylla.
“…ki jingïakren bakongsan bad ka World Bank ki la sdang bad ha kata ha ka nongrim la shna ïa ki DPR bad mynta ka tnad Planning ka la tyrwa ban ïoh jingmynjur na ka Kynhun Myntri khnang ban pyntyllun shakhmat bad kane ka jingpynbeit kyrpang bad ka World Bank,” la ong u Sangma.
“Kata ka dei ka jingpynbeit bad ngi la mynjur ban ïaid shakhmat bad kane ka projek jong ka World Bank. Ka jinglut baroh kan long haduh T.2450 klur ha kaba ïadei bad ka jinglut baroh kaba la mang pisa na ka bynta kine ki projek surok bad kiwei kiwei,” u la bynrap.
