Shillong, Nailar, 26: Ka Kashari Special Judge (POCSO), East Jaiñtia Hills District, ka la rai pynrem ïa ki ar ngut ki briew ba la tip kyrteng kum u Ganesh ba ju khot sin kum u Sangi Rai bad kum u Popo kynthup ruh ïa u Sawen Tangliang hapoh ki kyndon aiñ POCSO.
Ha u kyrwoh ba la phah da u Superintendent of Police ka East Jaiñtia Hills ha ka sngi Baar, u la pyntip ba ïa ka ejahar la ujor ha Khliehriat Women Police Station ha u snem 2023 pyrshah ïa u Sawen Tangliang bad ki Pulit ki la pynngat hapoh ka kyndon 5 (1) (m) (n)/6 POCSO Act bad la bynshet ïa ka jingtohkit ha ka Sub Inspector Kong L. Siangshai.
Hadien ba la pyndep ïa ka jingtohkit la pynngat kyndon ha ka 3 tarik, Risaw, 2023.
Ka Kashari Special Judge (POCSO), East Jaiñtia Hills District ha ka jingbishar ka la lap ba u Sawen Tangliang u la leh ïa ka kam bymman pyrshah ïa kawei ka heprit bad la rai pynrem da kaba hukum ban set phatok 25 snem bad kum ka jingpynshitom hapoh ka kyndon 6 jong ka POCSO Act nalor ka jingdaiñ kaba T. 30,000 hajar.
Ha kawei pat ka jingjia, ki Pulit ki la register ïa ka ejahar ha Khliehriat Women Police Station ha u snem 2023 hapoh ka Section 5(m) 6 jong ka POCSO Act bad ïa ka jingtohkit la bynshet ha ka Sub Inspector Kong L. Siangshai.
Hadien ba la pyndep ïa ka jingtohkit la pynngat kyndon ha ka 13 tarik, Naiwieng, 2023.
Ka Kashari Special Judge (POCSO), East Jaiñtia Hills District ha ka jingbishar ka la lap ba u Ganesh u donkti ban leh ïa ka kam bymman pyrshah ïa iwei i heprit bad rai pynrem da kaba set phatok 20 snem kum ka jingpynshitom hapoh ka Section 6 jong ka POCSO Act bad daiñ kuna T. 20,000 hajar.
