Shillong, K’lyngkot, 07: Ka Kashari Special POCSO ha East Khasi Hills ka la rai pynrem da kaba hukum ban set phatok 25 snem ïa uwei u runar uba donkti ban leh be-ijot ïa iwei i heprit kynthei ba dang 7 snem ka rta.
Katkum ka jingpyntip ki Pulit, ïa ka ejahar la ujor ha Mawngap Police Station ha ka 18 tarik, Jylliew, 2020 ha kaba la kynnoh ba u Bah Rocky Mawlong u la leh be-ijot ïa iwei i heprit kynthei ha kawei ka jaka khlaw.
Ïa u runar uba la don mynta 42 snem, la kem bad la pynngat kyndon ha ka 23 tarik, Naitung, 2020.
Katba dang ïaid ka jingbishar, u Bah Mawlong u la shah set ha Judicial Custody lai snem san bnai.
Ha ka 17 tarik, Nohprah, 2025, ka Special POCSO Court jong ka East Khasi Hills ba la khlieh da ka Kong MK Lyngdoh ka la rai pynrem ïa u runar halor ka jingpynkheiñ ïa ki kyndon jong ka POCSO Act.
Ka kashari ka la hukum ïa u nongshah kynnoh ba un hap ban shong phatok sa 21 snem bad hynniew bnai, kaba kot 25 snem ka jingshah set phatok namar ka jingdonkam ha ka kam runar pyrshah ïa ka khynnah rit.
Ïa ka jingtohkit la bynshet ha ka Woman Police Sub-Inspector Kong L. Kharjana kaba trei mynta ha Women Police Station, East Khasi Hills, Shillong.
